"Se ita la altera lei ne'e, signifika katak bu'at ida la bo'ok. Mas, se iha 2005 ho kondisoeins ne'ebé iha, ita halo lei tuir kondisaun ne'eba. Mas, ohin loron se ita iha ona tratadu ida ne'ebé fó ba ita juridisaun kontrole tomak ba ita nia tasi, klaru ke lei atividades Petrolíferas no minimu,” Xanana esplika iha Parlamentu Nasional loron Tersa 16/07.  

Eis Prezidente RDTL ne’e dehan, agora iha JPDA (Joint Petroleum Development Area) nia laran, buat hirak ne'e sei provoka no obriga atu haree to'ok ba alterasaun ruma, kona-ba lei atividades petrolíferas.

Xanana husu ba deputadu sira nu'udar lejisladores ne'ebé mak halo lei. Atu kompriende tanbasá mak tau agora lei sira ne'e, hodi husu revizaun. "Ha'u hakfodak uitoan. Ha'u sauda Deputadas ho deputadus FRETILIN nian ne'ebé mai iha ne'e. Mas ita bo'ot sira nia komunikadu de imprensa halo ita hanesan triste uitoan. Tanba ita bo'ot sira hanoin katak bu'at ne'e ha'u nian, (mas) la'os ha'u nian." 

Hodi hateke ba diresaun Deputadu Somoxto tuur, Xanana dehan “Deputadu Somoxto mak iha hela ne'eba. Deputadu, ema barak ne'ebé ita bo'ot mós haree mate iha ai-laran ne'eba ne'e. Sira nia ran ne'e mak obriga ita mai tuur daudauk iha ne'e. Ne'ebé bu'at ne'e la'ós ema ida nian. La'ós mós governu agora nian," hatete Xanana.

Xanana rekoñese, nia mós temi CMATS (Certain Maritime Arrangements in the Timor Sea, red.) mas nia tenke dehan iha komisaun konsiliasaun nia oin, nia nungka dehan sala. Xanana dehan falta de esperiencia. “Ami nia seidauk preparasaun ne'e mak Australia esplora. Ida ne'e (ami nia falta esperiencia). Ne'ebé ita karik hakarak ko'alia kona-ba konsensu, ita konsensu saida maka kona-ba nasionál ninian?" Xanana husu. 

"Ne'ebé ha'u husu bo'ot, komo ita bo'ot sira iha ne'e dehan katak orsida sei vota kontra pakote tomak, ami agradese. Ha'u sei lembra fatin iha ne'e, ha'u tuur iha ne'e kleur ona. Iha tempu ida ne'ebé ha'u dehan lakohi vota, bele sai. Sira seluk vota, entaun vota," Xanana ko'alia akompaña ho liman liki sinal sai.