Desizaun Partidu KHUNTO liuhusi estrutura nasional iha sede nasionál, Maleuana, sábadu (26/06), deside avansa ho kandidatura rasik, tanba konstituisaun mak fó dalan.
“Ami-nia suprior Partidu KHUNTO ninian, hamutuk ho estrutura nasionál partidu KHUNTO ninian, iha dia (26/06), ami tur hamutuk deside hodi propoin ami-nia prezidente da partidu KHUNTO rasik, atu kompete ba eventu demokrásia, eleisaun prezidensiál, 2022. ida ne'e laiha impaktu ba koligasaun partidu tolu ne'ebe forma oitavo governu liuhusi plataforma ne'e”, hatete Luis ba www.tempotimor.com iha PN, segunda (28/06).
Bazeia ba konstituisaun, partidu KHUNTO hamosu kandidatura rasik, tanba konstituisaun fó liberdade ba sidadaun sira atu kandidatu ninia-an ba Prezidente Repúblika.
Antes ne'e partidu tolu hanesan PLP, KHUNTO, FRETILIN asina ona nota intendimentu plataforma atu hametin oiatvu governu. Maibé filafali eleisaun prezidensial ne'ebé mak akontese ba tinan lima hanesan 2022 to'o 2027, ida ne'e depende fali ba kada partidu polítiku sira atu propoin ninia kandidatura.
“Ba ami partidu KHUNTO ne'e ami avansa ho ami-nia partidu rasik, lahatene kandidatu sira karik liuhusi koligasaun husi partidu sira, ida ne'e filafali ba sira-nia planu mais ami partidu KHUNTO avansa ho ami-nia lista pakote ho ami-nian kandidatura rasik”, hatete nia.
Tanba ne'e KHUNTO hanoin, sidadaun sira labele ko’alia tuir sira-nia hakarak hodi hamate valór demokrásiu.tanba Timor-Leste ne'e adapta diretu demokrátiku, sidadaun hothotu iha liberdade, iha diretu demokrátiku atu kompete ba jogu demokrásiu saida de'it.
“Ita sidadaun timoroan maka hatudu liman ba ema seluk inkapasidade, dezainkuantu liman fuan haat ba fali ita, dalaruma ita mak pior liu inkapasidade filafali”, deklara nia.
Bankada KHUNTO sujere ba ema hotu, atu tau demokrasia tuir ninia dalan, tanba nu’udar feto timoroan ida kuandu kandidata nia-an, ida ne'e fó valór boot teb-tebes ba timoroan, no fó ezemplu di’ak ba timoroan oinsá atubele aplika regra demokratiku ne'e ba nasaun. (*)