“Iha vaksin ne'e rasik dehan la obriga, realidade, xefe aldeia sira uza toa, hodi haruka komunidade sira tenke ser ba vaksin, to'o katuas ferik sira atu ba simu de'it osan terseira idade mós tenke ser ba uluk lai vaksin”, deklara Deputadu CNRT, Ricardo Batista iha plenáriu PN, segunda (28/06).
Tanba iha implemensaun vasina prevensaun covid-19 ne'e, governu rasik deklara pozisaun sei la ba monu ain ba populasaun sira atu haruka simu vasina.
Bankada CNRT ko’alia tanba bazeia ba evidénsia ne'ebé simu husi terenu no pozisaun CNRT prontu atu hatudu evidénsia ne'e ba governu.
“Ita-boot sira hakarak ha’u bele fó evidénsia (bukti), ita-boot sira keta dehan ne'e lalos, hakarak ita bele buktikan iha lapangan, ne'e keta halimar ne'e sériu”, hatete nia.
Nune’e mós, Deputada Maria Verginha Anabelo hatete, nia parte lamenta ho deklarasaun Ministériu Saúde nian ne'ebé foin rekoiñese vasina AstraZeneca labele fó ba ema ho idade 18 ba leten.
“Sasán sira ne'ebé pudia ser Ministériu relavante esplika ba publiku antes de obriga populasaun sira simu vasina, depois de iha impaktu tiha hanesan ne'e pior liután ikus ona mak governu foin rekoiñese AstraZeneca ne'e los duni tuir peritu sira katak ita labele fó duni ba idade menus husi 50 anos mai kraik”, hatete nia.
Pozisaun CNRT sempre hato'o kestaun ida ne'e hahú husi implementasaun vasinasaun AstraZeneca maibé govenru la intrese.
“Mais kuandu foin atu implementa vasinasaun, mai iha ne'e dehan 18 ba leten ne'e hothotu tenke simu, ida ne'e mak agora sai problema”, dehan nia.
Aleinde situasaun ne'e sai pior liután mak, bainhira governu aprezenta planu ida atu fó osan rihun US$10 ba sidadaun bainhira mate ba vasina.
“Kuandu Ministru ida hori bainrhira ha’u hatete dehan konfuzaun ne'e, nia halo nafatin konfuzaun tanba dehan fali kuandu ema simu Vasina mak depois kuandu mate, bele hetan US$10 mil, que pena, membru governu que la rekoiñese fali vida povu ninian, ho US$10 mil, saida mak ema?. Governu nia hanoin, se o fó US$10 mil depois nia mate se mak goja US$10 mil ida ne'e”, kestiona nia. (*)