Prezidente GMPTL, Deputada Lídia Norberta, konsidera Plan Internasional Timor-Leste nu'udar parseiru xave ba GMPTL, Iiliu liga ho asuntu labarik sira-nia kondisaun moris iha área saúde, edukasaun, sosiál no formasaun.

Tanba ne'e, iha loron kuarta (30/06), nu'udar momentu espesial ba GMPTL  no Plan Internasionál Timor- Leste, hodi selebra Memorandu Entendimentu kona-ba oinsá hametin liután servisu parseria, nune'e mós kooperasaun servisu iha área advokasia.

“GMPTL no Plan sei haforsa no hadi'ak liután relasaun servisu no kolaborasaun servisu ne'ebé estabelese ona antes no ba futuru, atu nune'e hamutuk bele asegura lejislasaun ho perspetiva protesaun ba labarik no feto, atu sira bele goza direitu ba igualdade no inkluzaun sosiál”, dehan Lídia iha PN, kuarta (30/06).

Haree ba oportunidade servisu ne'ebé iha, GMPTL agradese Plan nia inisiativa no disponibilidade ba kompromissu atu promove atividade advokasia husi nível nasionál to'o Munisípiu kona-ba direitu ba labarik feto, foinsa'e, atu haforsa liután prezensa no atividade GMPTL nian iha baze.

Memorandu entendimentu ne'e, ba fase dahuluk ho nia durasaun tinan 3, no GMPTL sei hetan mós apoiu pessoál rekursu umanu na’in-2 husi Plan.

Iha fatin hanesan, Diretora Plan International Timor Leste, Dillyana Ximenes hatete, akordu ne’ebé halo sei foka ba advokasia integrasaun direitu labarik no igualdade ba labarik feto ne’ebé haree mós ba lei nasionál kona-ba protesaun labarik, no feto.

"Ohin marka istória siknifikante ida tan, ba esforsu koletivu iha luta ba direitu labarik, no realiza igualdade ba labarik feto no feto, hodi kontinua haburas advokasia ba igualdade jeneru iha Parlamentu Nasional Timor-Leste”, dehan nia

Aleinde Kooperasaun ne’e, mós sei haree liuba uma fukun nomós Governu, hodi promove servisu advokasia ne’ebé organizadu, integradu, no sistimatiku no lidera husi GMPTL, hodi asequra katak direitu labarik, adolexente feto, no feto, bele hetan igualdade iha konteudu aprovasaun lei nasionál sira.

Iha parte kolaborasaun espesifiku iha faze dahuluk foka ba apoiu papel GMPTL hodi reforsa prosesu advokasia forte iha prosesu aprovasaun lei nasionál ba protesaun labarik, fiskalizasaun, no hamatan faze implementasaun hodi garante rezultadu atinjimentu favorável ba realizasaun direitu labarik, adolexente feto, no feto.

Haree ba Memorandu Entendimentu ne’ebé halo iha faze dahuluk ne'e periudu ba tinan tolu, mak hahú husi tinan 2021-2024.

Entretantu iha serimonia asinatura nota entendimentu ne'e hetan partisipasaun máximu husi membru GMPTL ho plan internasional inklui mós hetan akompańa direta husi Prezidente Parlamentu Nasionál (PN), Aniceto Longuinhos Guteres Lopes. (*)