Deputada CNRT, Maria Veneranda Lemos, triste no lamenta ho situasuan ida ne'e, tanba estadu lakon sidadaun ne'ebé mate ba vasina AstraZeneca.
“Situasaun ida ne'e ita kuandu rona, ita sente triste tanba ita lakon sidadaun ida, agora kestaun mak ne'e husi pesoál saúde sira ne'ebé mak hetan mandatu atu halo vasina sira halo tuir regra ka lae”, hatete nia iha PN, kinta (1/7).
Maibé dalaruma pesoál saúde sira ladun aplika regra kona-ba vasinasaun. Lolos bainhira ema ida ba vasina, nia test swab uluk, hodi haree nia pozitivu ka negativu, se nia pozitivu nia labele vasina, nia negativu, tenke hasai mos ninia tensaun.
“Ha’u la'ós médiku atu hatete bele ka labele, maibé iha mídia sosiál ita mós le”, dehan nia.
Iha fatin hanesan Xefe bankada KHUNTO, Olinda Guteres, mós ejize ba governu atu responsabiliza ba ferik ne'ebé mate ba vasinasaun AstraZeneca.
“Maluk ne'ebé mate ona, di’ak liu saúde, governu tenke toma responsabilidade, atu halot ne'e hanusa, ba família ne'e hanusa, orsamentu kan aloka hotu ona ba ne'eba, ne'ebé ita-nia maluk ida mate ne'e governu labele dehan katak masa bodoh tiha de'it”, dehan nia. (*)