Prezidente Ezekutivu, ANAS-IP, Domingos Pinto hatete MoU ho TIC atu estabelese Website Ofisiál no hodi públika informasaun ba públiku.
"Objetivu husi estabelese MoU refere atu TIC-I.P bele fornese servisu informasaun teknolojia (IT) ne’ebé presiza ba ANAS-I.P, hanesan estabelese website ofisiál ida ba ANAS-I.P., armazenajen dadus ba informasaun, fornese email ofisiál no servisu kontínua ne’ebé presiza iha futuru”, informa Domingos liuhusi, kuarta (07/07).
Tanba ANAS-IP ne’ebé estabelese iha tinan 2020, ho Dekretu-Lei no. 38/2020, 23 Setembru no simu responsabilidade atu propoin, halo monitorizasaun no asegura implementasaun polítika nasionál iha área rekursu bee nian, atu garante jestaun ne’ebé sustentável no integradu, nomós halo supervizaun no fiskalizasaun ba abastesimentu bee públiku nian, saneamentu urbanu no setór serbisu rezidu sólidu.
Selebrasaun MoU refere sei hala’o iha aban, loron 8 Jullu 2021, iha sede ANAS-I.P, iha Kaikoli, husi Prezidente Ezekutivu ANAS-IP, Domingos Pinto no Diretór Ezekutivu TIC-IP, Roberto Caetano de Sousa Vicente. (*)
