Iha serimónia ne'e Ministru Francisco hatete, ezisténsia rádiu UNITAL (RA-U) ne'e hanesan meiu di'ak ida ne'ebé bele ajuda governu hodi kontribui mós ba sosilizasaun regras ba prevensaun luta hasoru pandemia Covid-19.

Rádiu sira seluk ne'ebé eziste iha universidade sira seluk mós hanesan, nune'e governu sei nafatin hamriik iha universidade sira-nia sorin liliu liga ba área komunikasaun sosiál nia, tanba rádiu ne'e importante tebes no fasil liu atu transmite informasaun ba públiku.

“Ne'e hanesan pasu ida importante liu atubele estabelese rádiu iha Dili no iha areadór UNITAL nia, taba importante tebes atu transmite informasaun ba povu tomak iha Timor laran tomak, nune'e ho ezistensia rádiu ne'e bele kontribui mós ba sosilizasaun regra ba prevensaun luta hasoru pandemia Covid-19”, dehan Ministru Francisco Jerónimo iha Salaun UNITAL, Bekora, sesta (09/07).

Iha fatin hanesan Magnifiku Reitór UNITAL, Florindo Perreira hatete, ezisténsia RA-U ne'e nia benifisiu mak oinsá estudante sira iha uma bele rona no akompaña materia iha situasaun pandemia ida ne'e, hafoin sira bele halo diskusaun mós liuhusi meius seluk.

“Ezisténsia rádiu ne'e nu'udar meiu ida ne'ebé bele ajuda estudante sira liliu iha pandemia Covid-19, tanba estudante sira iha uma bele rona no akompaña materia sira, e depois mak sira bele halo diskusaun liuhusi whatsap ne'ebé kada profesór sira kria iha situasaun ida ne'e”, esplika Florindo.

Aleinde lansamentu ba RA-U, iha mós inaugurasaun kona-ba klínika UNITAL, peskas, inklui kampu multifunsaun. (*)