Deputada CNRT, Maria Veneranda Lemos hasai deklarasaun deskriminasaun hodi derije ba deputadu Aniceto tanba deputada CNRT husu intervensaun no pontu orden la hetan oportunidade atu ko’alia maibé meza PN deside hodi entrega fali tempu ba Ministru Asuntu Parlamentar no Komunikasaun Sosiál (MAPKomS), Francisco Jerónimo atu ko’alia.
Maibé Prezidente PN, Aniceto Longuinhos Guteres hatete, nia parte sei la fiar ona deputada CNRT tanba meza la halo deskriminasaun ba CNRT maibé kontinua deklara meza halo deskriminasaun.
"Ita-boot (Deputada CNRT) matenek ida, maibé ha’u la fiar ita-boot”, haktuir Deputadu Aniceto hafoin haksesu malu ho deputada Maria Veneranda Lemos iha plenaria Parlamentu Nasionál, tersa (13/7).
Meza PN la halo deskriminasun tanba deputadu sira ne'ebe rejista ba Pontu orden, deputadu barak iha ne'e.
"Ha’u nu’udar ativista diretu umanu, ha’u hatene saida mak deskriminasaun. Maibé imi akuza ha’u halo deskriminasaun, agora mak ha’u halo deskriminasaun, e pontu de orden iha ne'e la'ós ita-boot mesak”, hatete nia.
Deputada Maria Veneranda Lemos hatete meza halo deskriminasaun maka’as ba deputada CNRT, tanba desde hahú plenária, nia husu intervensaun no pontu orden mós le hetan autorizasaun husi meza.
"Ha’u husu intervensaun ita-boot la fó, pontu orden mós ita-boot la fós, ha’u dehan ita-boot halo deskriminasaun”, dehan nia. (*)