Ministru Prezidensia Konsellu Ministrus, Fidelis Leite Magalhães hatete, KM aprova ona tetu agregadu no dezagregadu ba Orsamentu Jerál Estadu (OJE) tinan 2022, ne’ebé aprezenta husi Vise-Ministra Finansas, Sara Lobo Brites.
“Konsellu Ministrus aprova mós konjuntu inisiativa adisionál ne’ebé fixa tetu agregadu ho montante millaun 1.571,6. Governu define ona prioridade nasionál neen ba OJE tinan 2022”, dehan Fidelis iha Palásiu Governu, kuarta (14/07).
Husi prioridade ne’ebé define hanesan, dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira (agrikultura no turizmu), ambiente no konetividade, dezenvolvimentu setór privadu, dezenvolvimentu rural no boa governasaun.
Aliened ne’e Vise Ministra Finasas, Sara Brite halo mós aprezentasaun ida ba kona-ba sorumutuk ho parseiru dezenvolvimentu sira tinan 2021 (Timor-Leste & Development Partners Meeting, TLDPM) ne’ebé sei hala’o iha Auditóriu Kay Rala Xanana Gusmão, iha loron 30 fulan-jullu.
Tanba TLDPM hahú uluk ho sorumutuk bilaterál iha loron 27 fulan-jullu, liuhusi sorumutk ida kona-ba integrasaun ekonómika rejionál iha loron 28 fulan-jullu no fórum ida Organizasaun Mundiál Komérsiu iha loron 29 fulan-jullu.
Sorumutuk ida ne’e ho parseiru dezenvolvimentu sira organiza tinatinan husi Governu hodi fahe nia vizaun ba oin analiza prioridade ba médiu prazu no hodi haree ba progresu ne’ebé alkansa tiha ona iha dezenvolvimentu nasionál. (*)
