Projetu lei ne'e, aprezenta husi Vise Primeira Ministra (PM) no Ministra Solidariedade Sosial no Inkluzaun (MSSI), Armanda Berta dos Santos, ho Ministra Saúde (MS), Odete Maria Freitas Belo.

"Atubele dudu ho lalais liután ita-nia programa vasinasaun nian. Ne'e mós hanesan oportunidade ida ba governu rasik liuhusi ninia membru sira atubele iha komunikasaun direta ho autoridade sira no ho ita-nia komunidade sira iha Munisípiu, para bele esklarese di'ak liután pro kontra sira kona-ba vasina ne'e”, deklara Ministru Prezidénsia Konsellu Ministru (KM), Fidelis Leite Magalhães, iha Palásiu Governu, kuarta (14/07).

Hanesan ezemplu, iha Munisípiu Bobonaru, Ministru Defeza (MD), Filomino da Paixăo de Jesus, mak responsábiliza, iha Rejiaun Administrativa Espesial Oekussi Amebeno (RAEOA), sei koordena husi Ministra Negósiu Estranjeiru no Kooperasaun (MNEK), Adalzija Magno, inklui munisípiu sira hotu.

Maibe, sei haree tuir kalendáriu ne'ebé inisia husi Komisaun Interministerial sira kona-ba programa vasinasaun nian ba populasaun hotu iha territóriu Timor-Leste laran tomak, no tuir tarjetu governu nian katak, loron sei fó vasina ba ema hamutuk rihun-hitu (7) liu.

“Sé ita-nia populasaun sira, e autoridade iha munisípiu, tantu autoridades polisiál, sivís, militár, no ita-nia autoridade relijióza sira, ita-nia amu sira, ita-nia Bispu sira, sé iha pergunta ruma karik, mak hakarak atu konfirma liu ho reprezentante governu sentrál nian, bele halo diretamente ho ita-nia membru governu sira ne'ebé mak destaka iha munisípiu sira”, esklarese nia. (*)