Prezidente Komisaun F, deputadu Noe da Silva "Buka Tuir" hatete, komisaun F iha loron 26 fulan-jullu, hahú halo diskusaun no aprovasaun ba relatóriu pareser ba projetu-lei ida ne'e, maibé adia ba loron 12 fulan-agustu, tanba presiza hein pareser balun husi entidade sira ne'ebé Komisaun F konvida ona.
"Ohin (26/7), ami halo diskusaun e aprovasaun ba relatóriu ikus husi ami-nia audénsia sira ne'ebé mak iha, maibé finalmente ohin ami la konsege halo aprovasaun ba relatóriu ida ne'e. Tanba kontiudu husi relatóriu ne'e rasik inklui husi pareser sira ne’ebé mak entidade sira ne’ebé mak konvida, seidauk inklui (envolve) hotu”, dehan nia iha PN, segunda (26/07).
Tanba ne'e, komisaun F sei aproveita oportunidade ida-ne'e, atu entrega pareser hirak ne'ebe entidade balun entrega uluk ona, ba deputadu sira atubele estuda, no iha loron (12/8) mak komisaun konvoka fali diskusaun no aprovasaun ikus ba relatóriu ne'e.
Maibé insiativa ba projetu lei protesaun labarik ne'e husi deputadu sira, bazea ba Rejimentu Parlamentu Nasionál artigo 96 (Ezerse inisiativa lejizlativa), númeru 1 dehan, laiha projetu-lei ida mak bele subskritu hosi deputado liu na’in-10.
Husi projetu lei refere koresponde mós ba artigu 18 (Protesaun ba labarik-oan sira) hosi Konstituisaun RDTL, númeru 1 mensiona labarik sira iha direitu ba protesaun espesiál hosi família, komunidade, no mós Estadu.
Aleinde kontra hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.
Iha númeru 2 hosi artigu ne’e hateten, labarik sira hetan direitu hothotu ne’ebé mundu rekoiñese, hanesan direitu sira-ne’ebé hakerek ona iha konvensaun internasionál, ne’ebé Estadu aprova no simu ona ka ratifika fila-fila.
Nune’e mós iha númeru 3 husi artigu 18 ne’e esplika, labarik hothotu ne’ebé moris iha kazamentu nia laran ka lae, iha direitu hanesan kona-ba protesaun sosiál. (*)