Deputada CNRT, Terezinha Viegas hatete, Bankada CNRT deklara ona iha debate estensaun estadu emerjénsia dala sanulu-resin-lima (XV) katak, atu evita kazu Covid-19, governu presiza taka metin fronteira.

"Bankada CNRT ezije ba Governu de Faktu atu taka metin fronteira, tanba CNRT lakohi atu Governu uza razaun Delta hodi aplika hikas fali lockdown totál iha Timor-Leste”, dehan nia iha diskusaun estensaun Estadu Emerjénsia (EE) ba dala-16 iha plenáriu PN, tersa (27/70).

Tanba, haree ba kazu variante Delta ne’ebé dadauk tama iha Timor-Leste, Governu planeia ona atu aplika lockdown totál.

CNRT deskonfia Governu hakarak duni atu variante Delta ne’e tama Timor-Leste atu nune’e bele kontinua sulan povu.

“Ministra Saúde deklara katak iha posibilidade Governu de Faktu sei aplika Konfinamentu Obrigatóriu iha territóriu tomak, pergunta maka ne’e, preparasaun saida mak Governu de Faktu ida ne’e halo ona atu aplika Konfinamentu Obrigatóriu?”? hatete nia.

Haree ba mudansa balun iha mundu, hanesan iha Inglaterra ne’ebé hapara ona lockdown mezmu nasaun ne’e sei iha kazu Covid-19, inklui variante foun ne’ebé hanaran Delta.

Husi kazu diária iha Inglaterra iha loron 24 Jullu 2021 mak 31,621 ho kazu ativu 1,096,000 no óbitu diária ne’ebé rejista iha loron 24 Jullu 2021 mak na’in-86.

Maske ho númeru óbitu ne’ebé kontinua eziste husi loron ba loron maibé nasaun refere hapara ona lockdown, kompara ho Timor-Leste ne’ebé rejista óbitu na’in-26 dezde inisiu husi Covid-19.

"Governu tau konsentrasaun ba de’it iha Covid-19 ne’ebé ninia taxa mortalidade iha Timor-Leste mak zero vírgula vinte-sinco porsentu (0,25%), enkuantu taxa sobrevivénsia iha noventa e nove vírgula setenta-sinco porsentu (99.75%)”, dehan nia.

Númeru ida ne’e sura bazeia ba dadus husi Sentru Integradu Jestaun ba Krize (SIJK) iha loron 26 fulan-Jullu 2021, ne’ebé Timor-Leste rejista obitu na’in-26 husi kazu pozitivu konfirmadu 10,348.

Bainhidara haree ba dadus husi SIJK ne’ebé hatudu katak situasaun Covid-19 iha Timor-Leste la’ós grave ka perigozu liu, ho kazu foun diária ne’ebé rejista ikus na’in-11, maibé tanbasá Governu no Prezidénsia Repúblika hakarak kontinua estende beibeik estadu emerjénsia. (*)