Xefe bankada PD, António da Conseição hatete, nia parte triste tanba desde diskusaun Estadu Emerjénsia (EE) ba dala-15 to'o 16, la hetan partisipasaun husi PM Taur, ho ninia Vise Primeiru Ministru, José Reis no Armanda Berta dos Santos.

"PD triste, tanba governu hahú husi estensaun estadu de Emerjénsia, dala-15, hanesan ukun governu ida ne’ebé ulun laiha tiha ona, governante prinsipal la mosu iha Parlamentu Nasionál”, deklara António iha plenária Parlamentu Nasionál, tersa (27/07).

PD lamenta tanba iha diskusaun sira dada povu barak nia matan no tilun, hakarak haree no rona mensajen husi líder governu nian maibé realidade la akontese.

Iha fatin hanesan Deputada bankada FM, Isabel Ximenes hatete, nia parte mós lamenta tanba durante diskusaun ba estensaun EE la hetan partisipasaun husi xefe governu Taur Matan Ruak inklui vise Primeiru Ministru na'in-rua.

“Bankada FM nota katak aprezentasaun governu nian ohin loron nafatin hanesan estensaun iha fulan kotuk, ne’ebé mak sein prezensa husi Xefe do governu, ho ida ne'e bankada FM lamenta tebes”, dehan nia.

Nune'e, Deputadu Bankada UDT, Francisco David afirma, nia parte fó apoiu deklarasaun deputadu sira nian kona-ba prezensa governu nian iha diskusaun Estadu Emerjénsia ba dala-16.

UDT haree prezensa Xefe Governu lolos importante, tanba povu la rona deklarasaun, no rona saida mak ko’alia, maibé povu hakarak reprezentante povu no na'in ulun sira kaer ukun ne'e tenke hatudu sinal esperansa ida ba povu, iha ambitu situasaun covid no variante delta.

“Timor terus demais liu ona, Timor hakarak moris di’ak enbora ita agora mai iha fulafulan estadu Emerjénsia, kada ves enkuandu ita iha laletek as ba, hateke tun ba kraik la hetan, matan mós talves at, dala ruma ita iha fatin laran, ita mós diuk ka roan povu nia halerik, maibé ho asuntu ne'e asuntu nasionál ne’ebé ita hotu tenke ser hamutuk hodi responde”, hatete nia. (*)