FRETILIN konsidera, notisia ho titlu refere ne'ebé tuun iha edisaun, Segunda (05/08/19), nu'udar reportajen sala kona-ba deklarasaun Sekretáriu Jerál FRETILIN, Dr. Mari Alkatiri iha kalan 03 Agusto 2019, iha Sede Komité Sentrál FRETILIN-CCF.
“FRETILIN haree notisia falsu ida ne'e hanesan tentativa ida atu provoka instabilidade no reasaun iha FRETILIN nia laran. FRETILIN mós kondena aktu husi orgaun komunikasaun sosiál Tempo Timor, ne'ebé ninia fonte úniku mak diskursu Sekretáriu Jerál FRETILIN Dr. Mari Alkatiri halo iha konviviu populár iha Sede CC,” hakerek Komunikadu Imprensa, Kuarta (07/08/19).
Partidu FRETILIN mós, tuir komunikadu ne'e, iha loron 7 fulan Agostu hatama ona surat ba Konsellu Imprensa hodi husu KI atu foti asaun no medidas tuir leis no regulamentu em vigor, relasiona ho servisu média nian iha Timor-Leste, ne’ebé loloos iha obrigasaun atu halo reportajen no informasaun ho faktus ne’ebé reál.
“Notisia refere mukit profisionalizmu jornalístiku. Tanba la hakerek kona-ba realidade akontesimentu. Maibé, inventa informasaun ne’ebé kria de'it konfuzaun iha públiku no haree mós katak notisia Tempo Timor ne'e sai tiha husi kontekstu tanba laharee ba diskursu tomak,” komunikadu ne'e hakerek tan.
Iha momentu ne’ebé Timor-Leste hasoru hela situasaun polítika mak la estavel, Partidu FRETILIN haree katak aktu hanesan ida ne’e, bele sai nu’udar tentativa atu hamosu instabilidadi iha rai laran, situasaun ne’ebé bele la ajuda koezaun sosiál.
Notisia ho titlu: “Alkatiri Ameasa Kuadrus Ho Deputado FRETILIN” ne'e rasik, to'o notisia ida ne'e tun, ema 5.610 mak lee no hetan 1,7k (1.700) like no 11 comment iha Facebook.
Atu hatene notisia refere bele klik: https://www.tempotimor.com/politika/735-alkatiri-ameasa-kuadrus-ho-deputadu-fretilin