"FRETILIN sujere ba Governu atu hapara temporariamente prosesu ensinu aprendizajen hodi evita aumentu númeru kontájiu iha ‘faixa etária’ ida-ne’e", dehan nia iha plenária PN, tersa (24/08).

Maibé husu mós ba ekipa Eletrisidade Timor-Leste, empreza públika (EDTL,ep) atu proativu liután hodi garante eletrisidade durante tuku-24 iha Ospitál Nasionál Guido Vakadares (HNGV), SAMES, no ba fatin izolamentu sira ne’ebé halo konta ba kazu ho gravidade.

Ho prezensa Covid-19 ne'ebé nafatin ejiste iha komunidade nia leet, atu normaliza mak ema hothotu presiza kompleta vasina, hatoman-an mantein distánsia sosiál, fase liman beibeik no uza máskara.

Maibé, preokupa nafatin eskola ne'ebé ativu tanba labarik sira ne'ebé ho idade menus husi 18 durante ne'e la simu vasina.

"Ami rekomenda ba Governu atu aselera prosesu akizisaun no vasina ba ita-nia populasaun ho ‘faixa etária’ tinan 12-17, ne’ebé reprezenta ‘faixa etária’ boot liu ne’ebé sai ‘futuros responsáveis’ ba nasaun ida-ne’e nian", dehan nia.

Durante ne'e sempre defende no ajuda sosializa ba populasaun kona-ba nesesidade atu simu vasina, nu’udar dalan ne’ebé nasaun sira iha mundu tomak foti hodi hasa’e sira-nia imunidade hasoru vírus.

Bainhira simu vasina, sei prevene-an rasik, nomós defende Estadu liliu koopera ho Governu, simu vasina hasa’e imunidade no evita halibur ema barak, nune’e evita mós kontaminasaun no kontájiu.

Maibé louva Governu ho Sentru Integradu Jestaun ba Krize nia esforsu no seleridade, iha tempu rekorde konsege prepara fatin izolamentu Vera Cruz, Lahane no Tasitolu iha sidade kapitál Díli, ho pesoál no ekipamentu ne’ebé garante tratamentu salva ema nia vida.

Deputada Bankada PD, Elvina Sousa, husu sidadaun hothotu atu lololiman ba malu hodi bele kontra Covid-19 tanba responsável ida ne'e la'ós Ministériu no individu nian de'it, maibé ne'e respinsabilidade povu tomak nian.

Xefe Bankada KHUNTO, Olinda Guterres hatete, Governu atu tau atensaun maka'as ba Polísia Nasionál Timor-Leste (PNTL) hodi kontrola membru Grupu Arte Marsiál (GAM), ne'ebé kontinua viola regra Estadu Emerjénsia iha fronteira.

Bainhira Governu ladun tau atensaun mak, númeru Covid-19 no variante delta sei kontinua aumenta iha Timor-Leste. (*)