"Fó korajen ba ha'u-nia maluk sira iha front line katak korajen nafatin, ha'u hatene ita-boot sira hetan problema barak liu no iha risku boot, maibé pasiénsia nafatin ho imi-nia servisu hodi luta hasoru pandemia mundiál ida ne'e", dehan Ministru Francisco Martins, bainhira halo lansamentu vasina ba dala tolu iha Munisípiu Manatuto, tersa (24/08).

Tanba Governu nafatin enkoraja pesoál saúde sira hodi halo kna'ar atu mobiliza populasaun, no fó seguransa ba povu atu nune'e ema hothotu bele iha konsiénsia katak vasina ne'e importante hodi hasa'e imunidade.

"Pasiénsia hasoru ita-nia komunidade tanba ita-nia Komúnidade ne'e iha karater oioin, balun seidauk komprende, balun komprende no balun sei tauk hela, maibé ho ita-nia prezensa iha sira-nia leet, bele influénsia sira, ita bele fó nafatin asisténsia ba sira, serbí nafatin sira atu nune'e saida mak estadu nia hakarak no ema hothotu nia hakarak iha Timor-Leste bele atinje liliu ita hakarak to'o 80% ita-nia komunidade bele hetan hotu vasina antes tinan ida ne'e remata", dehan nia. (*)