Tempotimor (Díli) – Delegasaun Timor-Leste, kompostu ema nain hitu, Segunda (19/08/19) liubá, aranka ba cidade Kazan, Rúsia. Iha nasaun ne'ebé koñesidu ho naran ‘Ursu Mutin’ ne'e, delegasaun Timor-Leste sei sai observadór ba eventu mundiál World Skills Competition (WSC) ne'ebé hala'o iha 22-27 Agusto 2019.

 

“Eventu mundiál ida ne'e, halo kada tinan rua. Ba tinan ida ne'e, Rúsia mak sai uma nain. Komisaun organizadora ba eventu ne'e, manda konvite ba Timor-Leste, liuhosi INDMO (Institutu Nasionál ba Dezenvolvimentu Mão-de-Obra),” hatete Diretora Nasionál INDMO, Isabel Fernandes de Lima batempotimor.com, Kinta (22/08/19) via rede whatsapp.

 

Tuir Isabel, objetivu husi eventu mundiál ida ne'e atu estabelese rede serbisu ho nasaun hirak ne'ebé iha mundo tomak. “Liuliu, liga ba formasaun vokasionál no profisionál, hodi promove Timor-Leste iha merkadu traballu internasionál,” nia esplika. 

 

Hatán kona-ba saida mak TL presiza banati tiur husi eventu ida ne'e, xefe delegasaun ne'e dehan, ezemplu ne'ebé mak TL sei banati tuir mak haree ema nia seriedade ba sira-nia investimentu iha programa formasaun profisionál. 

 

“Ho ida ne'e hodi komplementa nesesidade merkadu traballu no indústria, atu hametin nasaun sira-nia sustentabilidade dezenvolvimentu ekonomiku,” Isabel esplika.  

  

Delegasaun Timor-Leste ne'ebé observa eventu mundiál ne'e, kompostu husi Diretór Jerál SEFOPE, Aniceto Letosoro, Antonio de Sa Benevides (Membru Parlamentu Nasionál), Isabel Fernandes de Lima (Diretora Nasionál INDMO), Sonio Anuno S. da Silva (mentor delegasaun nian), Januario Moc (Diretór Sentru Formasaun ETDA), Jaquelina (Xefe Departementu TvET, INDMO) no Maria do Rego (INDMO).

 

Isabel dehan, orsamentu ba viajen no atividade ida ne'e mai husi Fundu Dezenvolvimentu Capitál Humanu (FDCH) no SEFOPE. “Kompetisaun ba abilidade nivel nasionál, kada tinan INDMO halo. Partisipantes sira, mai husi sentru formasaun ne'ebé iha Timor-Leste laran tomak,” nia informa.