Tempotimor (Lequidoe) – Komunidade Suku Faturilau ne'ebé lokaliza iha Postu Administrativu Lequidoe, Munisípiu Aileu, sei moris iha nakukun laran maski Timor-Leste restaura ona nia independensia ba dala 17 no komemora tan tinan 20 referendu.
Geraldo de Jesus Araujo, komunidade Suku Faturilau hatete sira sente triste tanba tinan barak ona Timor-Leste ukun an, maibé komunidade suku refere, kontinua moris iha nakukun nia laran.
"Ami iha ne'e, seidauk asesu ba eletrisidade, bee mos, estrada, inklui postu Saúde. Kona-ba dezenvolvimentu ami sente menus tebes ba ami. Tanba, ami atu lori ami nia produtu sira ba sidade mós susar. Ami nia oan sira mós tenki estuda iha naroman lampu tradisionál nian," dehan Geraldo ba
tempotimor.com, Kinta (22/08/19).
Iha fatin hanesan Xefe Suku Faturilau, Albano Amaral husu ba Governu, liuliu ba ministériu kompotente atu tau matan ba kondisaun ne'ebé povu iha suku ida ne'e infrenta.
"Ba governu relevante sira, bainhira tan komunidade Suku Faturilau bele sente infraestrutura baziku? Hanesan autoridade lokál ha'u husu ba Governu atu tau atensaun ba komunidade sira iha Suku Faturilau. Tanba, tinan 17 ukun an ona, maibé ami mak nune'e hela deit," dehan Albino Amaral.
Suku Faturilau, lokaliza iha sentru entre suku Namalesu, inklui Postu Administrativu Turiscai, Munisípiu Manufahi. Parte Leste baliza ho Postu Administrativu Natarbora.
Komunidade Suku Faturilau, kompostu husi aldeia rua hanesan Aldeia Karena no Aldeia Lebumera hamutuk uma kain 141 ho totál komunidade nain 738. Komunidade ne'ebá moris lor-loron nu'udar agrikultór no hakiak animál.