"Ohin momentu ida ne'ebé istória tebtbes ba Timor-Leste, ita ohin simu karta kredensiál husi nasaun ruanulu (20)", dehan Vise Ministru Negosiu Estranjeiru Kooperativa (MNEK), Julião da Silva iha Palasíu Presidensiál Bairopite, kinta (11/11).
Embaixadór sira-nia embaixada ne'e maioria iha Singapura, Jakarta-Indonézia no Austrália.
"Tanba pandemia ohin, ita simu atravez liuhusi de'it virtual, depois bainhira movimentu tranporte aero husi nasaun hotu iha mundu loke filafali ona odamatan Aeroportu hotu, hanoin sira sei mai atu entrega sira-nia karta kredensiál formalmente ba eselénsia Prezidente Repúblika", esplika nia.
Nune'e Prezidente Repúblika hato'o bemvindu no agradese ba Embaixadór sira ne'ebé mak hato'o ona sira-nia karta kredensiál no espera depois pandamia ida ne'e bele iha reuniaun bilaterais ho Prezidente Repúblika ho mós Governu.
Entretantu Embaixadór hamutuk 20 hanesan, Estadu Israel, Repúblika Popular Bangladesh, Reinu Dinamarka, Repúblika Azerbaujaun, Ordem de Malta, Repúblika Demokrátika Popular Argélia, Repúblika Federal Alemaña, Romênia, Repúblika Argentina, Repúblika Guiné Bissau, Reinu Kambodia, Repúblika Checa, Repúblika Italiana, Estadu Katar, Repúblika Demokrátika Popular Laos, Repúblika Kolombia, Repúblika Chipre, Repúblika Mozambike, Repúblika Federal Nigéria no Repúblika Islámika Pakistaun. (*)