"Ohin ha'u informa no diskusaun ho sua eselénsia Primeiru Ministru kona-ba, komunikasaun ho Ministru Justisa bazea rai ne'ebé parlamentu atu uza hanesan sira-nia fatin, ba abanbairua hodi hari’i edifisíu parlamentu nian iha futuru", dehan Ministru Francisco hafoin halo enkontru ho PM Taur iha Rezidénsia Farol, segunda (15/11).
Maske halo ona diskusaun ho Ministru Justisa no oras ne'e iha ona prosesu Ministru justisa nian, maibé informa hela ba Primeiru Ministru tanba iha instituisaun 9 ou 10 uza hela rai ne'ebé atu atribui ba parlamentu.
"Maibé sei halo lai avaliasaun, nune'e viavel kala’e?, ita atu halo oinsá muda ema sira ne'e ba fatin, tanba ita tenke prepara kondisaun foun atu sira bele hala'o sira-nia servisu, nune'e rai ne'e bele atribui ba parlamentu", esplika nia.
Enkuantu prosesu ih hela iha Ministru Justisa nia liman no hein hela atu fó paraser ba Primeiru Ministru.
"Ha'u hanesan Ministru ne'ebé tutela iha Mapkoms ha'u informa ba parlamentu nasionál no informa ba Prezidente parlamentu hodi hein prosesu tuir mai”, esplika nia.
Alende ne'e Ministru mós informa hela ba Primeiru Ministru kona-ba, rezolusaun balun husi jornalista sira nian, ne'ebé hato’o rasik bainhira partisipa seremónia kongresu Timor-Leste Press Uniaun (TLPU) iha Delta Nova, sábadu (13/11).
"Ha'u ba taka kongresu TLPU nian no hetan rezolusaun balun ne'ebé Jornalista sira halo iha sira-nia kongresu aprezenta mai ha'u, maibé ha'u halo ona esplikasaun e Primeiru Ministru dehan esplikasaun hanesan ne'e duni, tanba lei ba sira lei ketak ida la hanesan ho sira seluk”, relata nia. (*)
