"Prezidente Repúblika ho haksolok boot tebes hodi bele mai hamutuk iha musnisípiu Manufahi atubele fahe informasaun no rona informasaun husi ita-boot sira kona-ba lala'ok moris nian, lala'ok ukun nian iha ita-boot sira-nia munisípiu Manufahi", dehan PR Lú Olo iha salaun parokia Manufahi, kuart (17/11).
Tuir lolos PR mai iha fulan kotuk no tetu hela iha momentu iha ne'ebá prepara atu hiit mai, maibé tanba de'it moras Covid-19 la bele mai.
"Ami sente katak bainhira ita hotu di'ak oituan ba, ita bele ba hasoru malu hodi bele ko'alia ho haksolok, ko'alia hodi oin ba malu, hodi bele rona ho di'ak no tetu ho di'ak atubele fó resposta lolos ba preokupasaun povu manufahi nian", esplika nia.
Adminitradór Munisípiu Manufahi, Arante Izac Sarmento hatutan, povu munisípiu Manufahi ho haksolok no tetu hodi hein hela eselénsia ho nia komitiva nia vizita ofisial ida ne'e, hodi rona rasik mensajen nu'udar aman ba nasaun no ba povu Timor-Leste.
"Ita iha situasaun mundu ohin loron ne'ebé hasoru povu presiza tebes sua eselénsia nia prezensa iha rai ida ne'e. Iha biban ida ne'e mós hakarak hato'o ba sua eselénsia bele haree rasik ita-nia povu nia situasaun no rona rasik sira-nia esperansa ba sira-nia moris di'ak iha ita-boot ninia mahon", dehan nia.
Administradór postu administrativu Alas, Leopoldo Barreto haktuir, objetivu husi dialogu ne'e atu Prezidente Repúblika haree no rona direta difikuldade no preokupasoens husi komunidade nian.
"Primeiru sua eselénsia Prezidente Repúblika nu'udar simbolu nasaun iha mós espasu balun, sua eselensia atu tun direta haree kondisaun real iha terenu depois haree no atu rona direta komunidade nia difikuldade e preokupasoens", hatutan nia.
Bainhira rona tiha preokupasoens sira ne'e Prezidente Repúblika toma nota hodi lori ba nível nasionál halo koordenasaun servisu ho Governu depois bele fó solusaun ba preokupasaun sira ne'ebé povu enfrenta iha terenu. (*)