"Ema ne'ebé tauk iha juramentu tempu verifikasaun, sira ne'ebé haree juramentu rein bandeira jura uma lisan, lulik matebian sira hotu mak tauk, ita laiha evedensia fó presaun ba nia, nia la mai nia hakarak inventa, maibé nia haree kriteiru ne'ebé rigorozu ameasa ba nia vida nia deside la mai, ami laiha tan asaun seluk atu foti husik tiha de'it", dehan Manuel, kinta (16/12).

Tanba, dalan ruma inan ou aman veteranu, maibé mate tiha ona, hela nia oan sira mak trata dokumentu, entaun sira tauk atu tuir juramentu iha tempu verifikasaun dadus.

"Kuandu ita tauk berartih ita lalos, ita ba jura de'it, tanba inan aman terus ne'e o ba tauk fali halo saida", katak Manuel.

Nune'e, apela ba maluk sira hotu, juramentu la'os sai ameasa atu oho, maibé ejije ema hotu atu ko’alia lia loos hodi la'o tuir dalan ne'ebé loos.

Alende ne'e, dadus veteranu iha Konsellu Kombatentes Libertasaun Nasionál (CCLN-sigla Portugues) Dili kompostu husi Munisípiu 13 ne’ebé hamutuk rihun 4, husi Munisípiu Baukau veteranus barak falsifikasaun falsu dadus.

"Husi totál ne'ebé indentifika iha Dili kuatru mil ne'e, Baukau mós ita la hatene nia númeru, maibé Baukau mós tama iha númeru boot ituan, tanba ema barak uluk kuandu nia lapasa iha Munisípiu ba liu Dili, ba pasa fali iha Dili, entaun Prezidente komisarius membru sira iha nasionál heree situasaun ne'e sira hakfodak, ema ne'e la pasa iha Baukau derepente sai tiha veteranus, mai ona simu kartaun mak ami hakfodak", dehan Manuel.

Tanba ne'e, Komisaun Konsellu Veteranu Nasionál tenki servisu seriu atu kontinua buka tuir dadus falsu sira. Nia dehan, veteranu sira ne'ebé antes ne'e, tenta falsifika dokumentu, balun hatan ona iha Tribunál no halo ona kanselamentu ba sira nia subsidiu no rekolla ona atributu ne'ebé simu husi estadu.

Enkuantu iha Munisípiu Baukau mós deskonfia veteran barak falsifikasaun dadus, maibé prosesu la'o mak bele deskobre. (*)