Saudozu Silvino Adolfo Morais hakna’ar-an hanesan Deputadu iha Parlamentu Nasional husi bankada Frente Revolusionariu Timor-Leste no Independente (FRETILIN).

"Rezultadu votasaun a-favór 36, kontra no abstensaun 0, Nune’e votu pezár ba falismentu saudozu Silvino Adolfo Morais aprovadu”, dehan Prezidente Parlamentu Nasionál, Aniceto Longuinhos Guterres Lopes, iha plenária PN, tersa (04/01).

Deputadu Bankada FRETILIN, David Mandati sente triste tanba partidu Fretilin lakon nia kuadru di’ak ida.

Iha tempu luta ba ukun rasik-an, matebian mos fó ona kontribuisaun inklui hanesan membru União Nacional dos Esrudantes Timores (UNETIM).

Tanba ne'e, lori bankada Fretilin nia naran, hato’o sentidu lutu kle’an ba saudozu no família hotu.

Deputadu CNRT, Patrocínio Fernandes hatete, Parlamentu Nasional merese duni atu fó votu pezar tanba saudozu nu’udar ema ne’ebé kalma no dedikadu durante hala'o kna’ar-an hanesan membru Parlamentu Nasional iha lejislatura dalima.

Nune'e bankada CNRT hakarak hato’o sentidu profunda ba saudozu ho família no partidu Fretilin ne’ebé lakon nia kuadru di’ak ida.

“Ho hakruuk ba saudozu nia mate-isin hodi fó omenajen ikus hato’o sentidu kondolénsia ba saudozu no família, no husu família iha korajen nafatin hasoru situasaun ne’e”, dehan nia.

Xefe Bankada KHUNTO, Olinda Guterres, sente triste tanba lakon tan kolega deputadu di'ak.

Maske deputadu sira durante ne'e hala'o kna’ar iha Parlamentu, bele hakilar no hirus malu maibé família Parlamentu ida de’it. (*)