"Ne'e por orden konstituisionál, ne'e ita tenke tetu aspetu hothotu molok aprova lei ida. Se iha tendénsia negativu boot liu, kuandu atu aprova lei ida para prezudika ou ka lori prezuiju boot liuba Estadu, di’ak liu lei ita estuda didi’ak lai", dehan nia iha PN, kuarta (05/01).

Maske sosiedade sivíl kritika kona-ba lei ne'e maibé komisaun A hakarak klarifika katak konseitu pensaun vitalisia ka lejistika ne'e laiha ona, tanba altera ona iha tinan rua ba kotuk.

"Ita agora ne'e uza rejime no remuneratóriu ba orgaun Estadu, ne'e por orden konstituisionál. Ne'ebé sosiedade sivíl sira se ko’alia nafatin pensaun vitalisia ne'e problema iha saida", hatete nia.

Tanba lejisladór sira define lei ne'e bazeia ba orden konstituisionál katak tenke rekoñese no valoriza, orgaun titular sira liuhusi produz lei.

"Atu valoriza ne'e mak tenke tetu aspetu hothotu, benifisáriu labele lakon nia diretu tanba lei no konstituisaun mak fó, Estadu mós labele hetan prejuizu kuandu ita aprova lei ne'e, intermu politiku ou intermu ekonomiku”, afirma nia.

Maske prosesu ne'e komisaun A diskute ona maibé to'o agora seidauk iha konseitu kona-ba norma tranzitóriu.

Ho ida ne'e, presiza estuda tanba konseitu balun la hetan ninia ekilibru iha definisaun no kompriensaun porfundu ba nia vizaun, bele fó prezuizu liliu ba benifisiáriu sira.

"Ida ne'e mak rejime remuneratóriu ba orgaun titular sira-nian, e ita diskute seidauk haruka ba Parlamentu, tanba ne'e pendente hela”, dehan nia. (*)