Vise Prezidente Parlamentu Nasionál (PN), Maria Angelina Sarmento Lopes hatete, pedidu substituisaun ne'e, aprezenta husi Xefe Bankada FRETILIN, David Dias Ximenes "Mandati" liuhusi Sekretária Meza Parlamentu Nasionál Lídia Norberta hodi husu autorizasaun bazeia ba termu númeru 1 no 2, iha artigu 5 no númeru 1 iha artigu 9 husi lei númeru 5/2004, loron 5 fulan-maiu, kona-ba estatutu deputadu, nomós númeru 1 artigu 5 husi rejimentu Parlamentu Nasional.
"Ho nune'e, ha'u konvida kedas Deputadu Luis Geraldo Ximenes Oliveira, atubele hola fatin iha Señor Saudozu Silvino nia fatin”, dehan Deputada Angelina iha plenaria Parlamentu Nasionál (PN), segunda (10/01).
Ho ida ne'e Luis Geraldo Ximenes Olliveira hahú hala’o kna’ar hanesan deputadu husi Bankada Fretilin husi loron segunda (10/01) to'o mandatu lejistura Dalima (V) termina iha tinan 2023.
Saudozu Silvino Adolfo Morais hakotu iis iha Ospital Nasionál Guidu Valadares (HNGV) loron 3 fulan-janeiru tinan 2022, tanba hetan atake fuan. (*)