Koordenadór Movimentu Rezisténsia Apoia Maun Boot Xanana, Carlos dos Santos hatete, konfiansa ne’ebé mak iha mak grupu movimentu sira sei halo esforsu hamutuk oinsá mak hafanun hikas povu liliu inan-aman no joven sira atubele vota ba Maun Xanana no Horta.

“Ho konfiansa ami junta ona, ami sei lori hikas Maun boot Ramos Horta ba Aitarak-Laran no movimentu sei hakas-an tama sai uma ba uma hodi fanun ita-nia inan aman no joven sira hodi vota ba maun Ramos Horta no Maun Xanana”, dehan nia hafoin hala’o enkontru ho Premiadu Nobel da Paz, José Ramos Horta iha salaun enkontru Igreja Katederal Dili, domingu (06/02).

Dadauk, movimentu haat mós hala’o hela dor to dor ka tama sai uma komunidade hodi esplika ba povu kona-ba fukun ba krize politika ne’ebé akontese ida ne'e so bele hadi’a hikas hosi Xanana no Ramos Horta liuhusi ukun.

Koordenadór Movimentu Civika Nasionalista Timorens, Agapito Cabral hatete, úniku Xanana no Horta mak bele hakotu krize politika liuhusi ukun ne’ebé matenek no hatene halibur masa kria paz no hadi’a ekonomia nasaun no promove naran Timór ba mundu. 

Nune'e mós Koordenadór Movimentu Brigada Negra Munisípiu Baukau, Fransisco Casimiro da Costa afirma, dadaun ne'e sira nia ekipa Movimentu Líder Komunitáriu ne’ebé reprezenta husi autoridade suku kuaze 35 iha Baukau kontinua servisu maka’as hodi lori vitória ba Horta. 

“Ami prontu ona lori ita-boot ba Aitarak-Laran, tanba ekipa rezisténsia sei hamarik iha ita-boot nia kotuk hodi tama sai uma komunidade”, infirma nia.

Reprezentante Organizasaun Juventude Partidu (OJP-CNRT), José Virgilio Guterres hatete,  iha Konferénsia nasionál CNRT ne’ebé hala’o iha loron 23 janeiru 2022, deside hili Laureadu Nobel da Paz, José Ramos Horta sai Kandidatu CNRT nian ba Prezidente Repúblika períodu 2022-2027.

“Ita lori maun Boot Ramos Horta atu hamos aitarak ne’ebé nakonu hela iha Palásiu Prezidente Aitarak-Laran no sai prezidente ba povu tomak, la’ós sai fali prezidente ba partidu ka grupu politiku sira”, afirma nia.

Iha Konferénsia Partidu CNRT nian ne'e deside, José Ramos Horta kandidata-an ba PR, tanba nia prienxe duni rekizitu sira ne’ebé CNRT hatuur ona. 

Rekizitu sira ne’e mak hanesan, Prezidente Repúblika eleitu komprometidu atu respeita no halo tuir de’it saida maka Konstituisaun RDTL haruka, nune’e komprometidu atu hatuur fali orden konstitusional ne’ebé politiku má-fé sira sobu no estraga tiha ona. 

Bainhira eleitu komprometidu atu hatuur hikas lejitimidade no dignidade orgaun Parlamentu Nasionál ne’ebé partidu ambisiozu sira halo Asaltu Poder hodi sobu orgaun ida ne’e iha 19 Maiu 2020.

Prezidente Repúblika eleitu komprometidu atu restaura fali lejitimidade no funsionamentu normal orgaun Governu ne’ebé dezde 2020 la-funsiona ho normal ne’ebé rezulta ekonomia rai laran hakdasak ba beibeik.

Iha mós rekejitu atu halo reforma iha setór judisiáriu nune’e bele garante no asegura aplikasaun Lei no Orden, liliu bele garante justisa tuir Konstituisaun no Lei sira haruka no ikus liu atu lahalo Prezidente Repúblika sai fali opozisaun ba Governu, nune’e Governu tuir mai bele atinje estadu tomak nia objetivu dada Kadoras Greater Sunrise mai Timor-Leste.

Ba apoiu hirak ne'e, Premiadu Nobe da Paz, José Ramos Horta hatete, nia parte prepara ona ajenda no materia ne’ebé sei fó sai durante ninia kampaña politika, bainhira eleitu sai prezidente sei hadi’a hikas imajen Estadu Timor-Leste no rezolve problema iha orgaun soberania sira hanesan, Parlamentu Nasionál, Tribunál.

Horta mós hato’o ba grupu masa no vimentu hirak ne’ebé kontinua fó fiar ba nia eleitu dala ida tan sai Xefe Estadu ba períodu 2022-2027.

“Ami rua maun Xanana sei ko’alia  barak liu bainhira iha kampaña, tinan barak ami rua la’o hamutuk haree ita-nia estadu ne’e la’o fali ba kotuk, tanba ita-nia diplomata sira mós haree no preokupa ita-nia situasaun politika no ekonomia ne’ebé monu maka’as loos”, afirma nia.

Koordenador Jerál Organizasaun Sagrada Família, Munisípiu Baukau, Agostinho Gusmão Braz esplika, agora dadaun partidu FRETILIN Baukau komesa nakfera, tanba nia rasik organiza masa apoia Xanana no Horta.

“FRETILIN agora tuur la hakmatek, tanba ha’u halo mobilizasaun nafatin, masa atu Baukau sai ita-boot (Ramos Horta) nian, tanba joventude no autoridade sira sei hamarik iha ita-boot nia kotuk, tanba tempu ona, ba Xanana no Ramos Horta”, deklara nia. 

Reprezentante Veteranu Baukau, António da Costa “Derok Masin” haktuir, dadauk husi parte veteranu Baukau nian, sei apoia kandidatu ida ne’ebé Prezidente Partidu CNRT, Kay Rala Xanana Gusmão tula liman, José Ramos Horta.

Tanba iha kapasidade másimu atu hadi’a hikas nasaun no komprometidu atu reinpoin prinsipiu no valór sira K-RDTL. 

Hafoin ekontru ho movimentu politiku sira, Koordenadór Partidu CNRT Munisípiu Baukau, Virgilio Pereira hamutuk ho Ramos Horta lansa kedas sede ekipa susesu prezidente repúblika, José Ramos Horta iha Aldeia, Lutumutu, Suku, Trilolo, Munisípiu Baukau Vila. (*).