"Ha’u hanoin di'ak liu, ita prontu de'it, se-nu-kazu Prezidente Repúblika foun mai atu disolve Parlamentu, sé nia iha dalan”, deklara Aniceto iha plenária PN, segunda (07/02).

Tanba, deklarasaun ne'e kandiditu José Ramos Horta  fó sai ona, se nia iha ona dalan, bele disolve de'it di'ak liu, duke deputadu dada diskusaun ba asuntu ida ne'e iha plenária laran.

Deputadu Bankada Frente Revolusionáriu Timor-Leste no Independente (FRETILIN), Marito Mota hatete, laiha golpe ne’ebé atu mosu iha parlamentu nasionál tanba votasaun hodi halo mudansa ba kargu Prezidente Parlamentu Nasionál ne’ebé mak akontese iha loron 18-19 maiu 2020, ne'e halo tuir rejimentu.

"Hatan loloos de'it ba situasaun ne’ebé mak momentu akontese iha ne'e, tanba tempu kampaña ona ita espalla informasaun katak iha autorizasaun ba forsa ho PNTL hodi halo mudansa ba meza ne'e laloos”, hatete nia.

Ho situasaun ne’ebé mosu, iha momentu ne'eba, husu ba komandante seguransa Parlamentu Nasionál, momentu ne’ebé sei lidera husi Komandante Alexandrino (Alex Samurai) dehan sira monta duni seguransa iha Parlamentu Nasional ne'e maibé ne'e ba deputadu 65, no la'ós la tau ba deputadu ida.

"E iha momentu ne'eba Vise na'in-rua (Luis Roberto ho Maria Angelina Sarmento Lopes hetan seguransa propriu eh Prezidente Aniceto iha tempu ne'eba seidauk iha seguransa”, haktuir nia.

Tanba situasaun ne'e entre deputadu ho deputadu mak dudu malu, hodi halo eleisaun ba meza, tanba ne'e husu deputadu sira labele besik ona tempu kampaña mak lansa informasaun ne'ebe ba kraik hodi provoka fali situasaun ne’ebé la'o tiha ona.

"Ida ne'e mak hakarak halo los de'it ida ne'e, tanba ita ho ita mak duni malu iha ne'e no atu baku malu tan iha ne'e, e laiha polísia no laiha defeza ida iha ne'e”, hatete nia.

Xefe Bankada Frente Revolusionáriu Timor-Leste no Independente (FRETILIN), David Dias Ximenes 'Mandati', kontra no rejeita deklarasaun deputadu balun ne’ebé dehan nakdedar tanba iha ne'e laiha deputadu ida mak ko’alia ho nakdedar.

"Se mak nakdedar fali ba ida ne'e maromak, ita ko’alia ne'e la nakdedar ida, ema la biasa nakdedar mak ohin loron dehan fali nakdedar ne'e, ema ida la nakdedar ida, ita iha ne'e ko’alia ba malu, ne'e ga, laiha ema ida iha ne'e nakdedar”, dehan nia.

Tanba ne'e husu labele ko’alia fali hanesan liafuan ne’ebé la merese atu ko’alia, maibé atu halo esklaresimentu de'it katak iha rejimentu artigu 20 ne’ebé uluk uza ba Prezidente PN, Arão Noe Amaral ninian ne'ebé mak dadauk sei uza hela.

Maibé distituisaun ne'e iha regra mak dividamentu justifikada aprezenta ona iha rekerimentu, ne'e obrigatoriamente tenke iha votasaun ajenda sesaun plenária.

Ho ida ne'e, kuandu dehan fali golpe, hanesan Xefe Bankada CNRT, Duarte Nunes ko’alia laiha, tanba buat hotu kumpre de'it ba lei, no laiha ida mak desvia husi lei ida ne'e.

Xefe Bankada CNRT, Duarte Nunes hatete, dala barak CNRT sempre ko’alia liafuan golpe mosu iha Parlamentu ne'e tanba liga ba asaun ida uza forsa no polísia ne’ebé akontese iha momentu votasaun ba kargu prezidente PN, iha loron 18-19 maiu 2020.

"Iha momentu ida be ita haksesuk malu iha leten ne'ebá, uma altura polísia retira-an tiha ba liur, ami hanoin para tiha maibé kuandu filafali mai, halo fileira ida, depois ami husu tanba saida, ah ne'e tanba prezidente fó orden ba Ministru Defeza ho seguransa atu forsa polísia organiza atubele halo eleisaun. Entaun ida ne'e uza forsa ba halo bareira para ba halo eleisaun ne'e, ida ne'e tama golpe ka la'e”, hatete nia.

Ho akontesimentu ne’e, CNRT haree hanesan golpe tanba uza forsa atu halo asaun ruma ne’ebé dehan golpe.

"Ida ne'e mk ita lalika sili ona, ita hein de'it povu mak hatene, ita lalika soe rai rahun ba povu”, dehan nia. (*)