“Momentu ida ita atu sukat partisipasaun públiku nian, partisipasaun povu no partisipasaun ita hothotu nian, tanba ne'e, postu reklamasaun eleitorál ne'e atu sukat mós nia indikadór to'o iha ne'ebé, edukasaun sivil ne'ebé durante tinan ruanolu, ita halo ne'e nia indikadór ita atu sukat”, dehan Diretór Yayasan HAK, Sisto dos Santos, iha Asosisaun HAK, Farol, sesta (18/02).

Tanba ne’e, HAK sei servisu hamutuk ho nia membru sira ne'ebé establese iha Munisípiu sira atu halo estratéjia ba postu reklamasaun eleitorál ba eleisaun prezidensiál

Ba kriasaun postu refere ho vizaun ida mak eleisaun justu demokrátika ba dezenvolvimentu nasionál ne'ebé dignu no sustentável, no nia misaun hasa'e taxa partisipasaun sidadaun krítiku hodi halo kontrolu ba prosesu eleisaun.

Iha mós objetivu ne’ebé atu fasilita partisipa sidadaun sira hodi divulga artikula no reklama prosesu eleisaun ne'ebé justu no livre, hamutuk hodi tau matan ba situasaun sira ne'e.

“Ita hamutuk oinsá tau matan ba situasaun ida ne'e, la’ós de'it Timoroan maibé internasionálmente tau matan hela ba ita-nia eleisaun ida ne'e, tan saida mak ita nu'udar povu mós iha derver atu tau matan ba situasaun ne'e rasik”, dehan nia.

Diretór Adjuntu Gabinete de Apoiu Sosiedade Sivil no Auditória Sosiál (GASSAS), Elvin Duarnte Soares Noronha hatete, iha lansa ne’e bele enkonraja sidadaun sira-nia partisipasaun ba eleisaun prezidensiál tinan 2022 ne'e.

“Espera ba postu reklamasaun eleitorál ida ne'e, bele enkonraja tan sidadaun sira hotu, oinsá hasa'e taxa partisipativu iha prosesu eleisaun demokrátika ida ne'e”, dehan nia.

Ho kriasaun ne’e agradese mós ba Yayasan HAK tanba servisu voluntáriu ho nia kometmentu ne'e mak di'ak liu ba prosesu eleisaun prezidensiál ne’ebé sei hala’o iha loron 19 marsu 2022. (*)