“Ami hato’o kona-ba preokupasaun ne’ebé agora dadaun iha postu Laklo, liliu ba kalamidade ne’ebé akontese iha 4 abril to’o agora halo povu iha postu Laklo halerik hela ba atividade ne’e, kuaze maioria sira-nia natar, to’os no uma fatin ne’ebé mak agora dadaun seidauk iha mudansa rekoperasaun ruma husi Governu, tan ida ne’e mak ami hakarak hakbesik-an direta ba Prezidente, ami hato’o ami-nia preokupasaun sira ne’e”, dehan Reprezentante Komunidade Vítima Dezastre Naturál, Vitorino Maria de Jesus da Costa, hafoin hasoru malu ho RR Lú Olo iha Palasíu Prezidensiál Bairopite, sesta (18/02).

Tanba natar no to’os ne’ebé hetan estragu husi dezastre naturál ne’e kuaze ektare atuslima (500), to’o agora komunidade sira seidauk bele utiliza.

“Natar ho to’os sira ne’e hahú kedas husi ita-nia area ne’ebé mak baliza ho Aileu husi natar ne’e iha munisípiu Manatuto estragu hotu, ho nia volume kuaze ektare atuslima estragu totál, ne’ebé ba irrigasaun totál tomak ne’ebé mak iha komunidade labele utiliza tan”, esplika nia.

Antes ne’e, reprezentante komunidade Laklo mós aprezenta ona preokupasaun hirak ne’e ba Governu, maibé to’o agora seidauk iha resposta ruma.

Nune'e, Xefe Estadu kompromete, sei informa preokupasaun sira ne’ebé komunidade Laklo enfrenta ba minitériu relevante hodi buka solusaun atubele fasilita komunidade nia atividade. (*)