Mandatu Prezidente RAEOA sai polemika, tanba hili bazeia ba lei rasik no hetan pose husi Prezidente Republika.
Maski nune'e, Prezidente Bankada CNRT, Duarte Nunes hateten, atu termina mandatu prezidente RAEOA ne’e kompeténsia governu nian.
“Bainhira (Mari Alkatiri) lakohi lidera ona ne’e, só haruka karta ofisial ami lee hotu ona ne’e loos. Maibé ko’alia de’it ne’e seida’uk loos”, tenik nia, iha Uma Fukun PN, Tersa (26/3).
Iha fatin hanesan, Deputadu Mariano Assanami Sabino hateten, atu termina mandatu Prezidente Autoridade RAEOA ne'e kabe ba kompetensia Prezidente Repúblika no Primeiru Ministru nian.
“Deklarasuan ne’e direitu maun Mari nian. Ne’ebé atu kontinua ka lae ne’e Governu mak sei deside hamutuk ho Prezidente Repúblika”, dehan nia.
Reprezentante povu ne’e salienta, deputadu sempre apoiu ba servisu sustentavél no tenke iha kontinuidade, saida mak prioridade ba povu. Tanba ne’e, buat ne’ebé di’ak ba povu timorense labele halo politiza.
