Akontesementu iha sentru votasaun Tirilolo, sentru votasaun kaisidu, Postu Adminisitrativu Baukau Vila, Munísipiu Baukau.
"Iha sela agora sira na'in-6, sira ne'e kuaza lanu hotu, sira espresa sentimentu ba sira nia kandidatu ne'ebé mak apoiu ba, sira lanu ba fali sentru votasaun tenta pertuba situasaun, entaun parte segúransa ita asegura kedas," dehan komadante komandu PNTL Munísipiu Baukau, Superintendente António De Sá, domingu (20/03).
Dadaun sidadaun na'in-6 kontinua iha sela detensaun hodi halo identifikasaun durante oras 12, hafoin konklui prosesu sei aprezenta ba Tribunál tuir dalan legál.
Alende ne’e, iha loron 18 fulan-marsu tinan 2022, bainhira membru Polísia akompaña matérial siensetivu no nonsiensetivu ba Postu Adminisitrativu Baguia, joven balun ho kondisaun lanu tenta halo perturba situasaun, maibé parte segúransa konsege hakalma.
"Ne'e joven sira lanu, sira uza nafatin ita nia kandidatu independente sira liu-liu husi númeru 8 nian, komandu fó ordem ba membru sira atua haruka sira fila ba ida-idak nia uma," nia hatete
Enkuantu hafoin remata eleisaun iha sentru votasaun, transporta matérial siensetivu no nonsiensetivu husi Postu mai apuramentu Munísipal, situasaun iha Munísipiu Baukau la'o kontroladu. (*)