“Mais kuandu lei ne'e mak iha ona populasaun sira labele halo uma sein koiñesimentu husi Autoridade sira, porque ne'e área bandu, área risku dezastre, área ne'ebé mak protezidu ne'e ita labele halo uma iha ne'ebá”, dehan Diretór Jerál Dezenvolvimentu Rurál husi Ministériu Administrasaun Estatál (MAE), Resito Guterres, iha Kolmera, segunda (04/04).

Ba medida ida ne'e nu’udar sustentabilidade iha futuru ne'ebé mak iha, tanba ne'e sei haforsa filafali baze legál sira liliu ba implementasaun asuntu konstrusaun uma no autorizasaun lisensa iha suku.

“Purke durante ne'e ita-nia xefe suku, autoridade komunitária sira, ami sempre orienta sira sempre ba avizu-avizu de'it mais laiha baze legál ida para atu orienta katak komunidade tenke kumpre ida ne'eba, kumpre ida ne'e”, hatete nia.

Bainhira enkuadramentu legál iha ona, ida ne'e sei loke dalan ba autoridade lokál ho komunitáriu sira para sosializa ba populasaun atu hatete bainhira konstrui uma.

“Baze legál sira ne'e sei fó forsa ba autoridade lokál sira para sosializa e kuandu komunidade sira mai mak atu kontinua hela ne'e iha ona kestaun seluk ona, ne'e ita tenke hakarak ka lakohi bandu ho lei, sé la'e agora ita ko'alia malu de'it mak akontese dadauk ne'e”, esplika nia.

Husi medida ida ne'e, Governu mós iha medida ida ne'ebé hanaran alerta sedu oinsá mak kontinua alerta no salva populasaun sira iha tempu udan. (*)