“Ha'u-nia ekipa halo ona koordenasaun ho ita-nia padre iha Dom Bosco ho mós ita-nia populasaun sira iha ne'ebá e ha'u nomeia ha'u-nia Diretór ba Dezastre halo kontaktu bebeik atu ita husu para sira fulan oin sira tenke ser sees husi ne'ebá”, dehan Ismael Babo ba jornalista sira iha Ótel Timor, tersa (05/04).
Tanba fatin ne'ebé dadaun ne'e vítima sira okupa, fatin ba formasaun ba joven sira, tanba ne'e mak Governu hakarak muda sai sira ba fatin ne'ebé protejidu.
“Iha ne'ebá fatin sentru ekollamentu temporariu la'ós permanente tanba fatin ne'e sentru ba formasaun tanba ne'e mak ita-nia joven sira liuhusi ita-nia padre sira atu fó formasaun ba sira entaun ita husu ba sira muda husi fatin ne'ebá ba fatin ne'ebé mak livre”, afirma nia.
Kestaum ida mak sira hela ne'ebá tanba dezastre, tanba ne'e mak bazei ba lei protesaun sivíl artigu 20 kona-ba utilizasaun rai utilizasaun proividu labele halo uma iha fatin ne'ebé risku dezastre no atu implementa.
Antes ne'e, vítima dezastre naturá, Clementina Trindade, husu ba Governu atu hadi’a fali sira-nia fatin iha mota ibun hodi hala'o fali sira nia atividade hodi suporta oan sira no sustenta família uma laran.
“Ami hakarak hanesan tau matan ba ami atu ami fila ba ami-nia fatin, ba fatin ne'ebé bee lori ona ne'e mak Governu lakohi tau matan entaun Governu fó de'it lona mai ami atu ami dada iha mota laran de'it ba ami atu hela, ami hakarak ba ami-nia fatin”, dehan nia.
Vítima ne'ebé hakarak fila ba hela iha mota ninin Komoro tanba sira-nia moris loroloron depende ba piñera raihenek hodi selu oan sira-nia eskola no sustenta uma laran sira.
Desizaun ne'ebé mak vítima sira foti ne'e hakarak ne'e hela fali iha mota ibun hodi piñera rai henek hodi hadia moris loroloron.
“Ami hakarak ba hela iha ne'ebá tanba ami buka moris ne'e iha ne'ebá, atu hola rai mós ami hola labele, ami sira hela iha mota laran mota lori ne'e tanba ami nia servisu mak pinera raihenek de'it hodi selu oan sira nia eskola no sustenta uma laran" nia afirma
Dadaun ne’e Governu aolika artigu 20 Lei Protesaun Sivíl Governu dekreta dekretu lei nú 7 iha artigu 19 kona-ba kriteria atu fó rekuperasaun ho nia kritéria Primeiru sidadaun vítima sira sei labele fila ba hela fali iha fatin ne'ebé dezastre tiha ona. (*)