"Iha Baukau ho ordem husi Tribunál nian atu halo buska detensaun i aprensaun kontra arguidu ho Inisiál AN, iha ne'e indekasaun ba jogu ilisítiu, ho nune'e Ministériu Públiku (MP) promove ba Tribunál, Tribunál emite mandadu detensaun i buska domisíliaria ba arguidu AN," dehan Xefe investigadór PCIC, Floriano Gurerres Ramos, iha fatin buska vila nova Baukau, kuarta (25/05).
Dadaun Tribunál emite tán mandadu buska ba dala rua nian, tanba iha tinan-2021 ne'ebé halo uluk buska Tribunál hatete ona, sasan jogu nian sai ona Tribunál nian, nune'e wainhira hakarak loke fali tenke halo koñesementu ba Tribunál, maibé laiha koñesementu, Tribunál emite tán karta mandadu buska ba arguidu.
"Ami halo aprensaun segel ba fatin (jogu ilisítiu) ida ne'e, entrega ba Ministériu Públiku katak, eziste duni ékipamentus mákina de jogu," nia hatete
Iha prosesu mandadu de buska, arguidu kopéra ho parte Polísia sira, maibé dokumentus ba jogu refere ne'ebé parte Polísia halo aprensaun la fó sai ba públiku.
"Ida ne'e ami seidauk fó sai ba públiku, ami sei relata ba Ministériu Públiku hetan ou la hetan ikus Tribunál mak deside," nia hatete
Mandadu ba buska iha domisíliu no aprensaun ba sasan husi Tribunál Distritán Baukau (TDB), tuir dispozisaun iha artigu 37 nú.2 husi KRTL iha artigu 226, nú.1, artigu 168 nú.1 no artigu 170.
Ordem buska ne'e, konsede iha auto inkéritu nian Nuc.0307, 0308, 0309 no 0310/PCIC ne'ebé dadaun investiga ba suspeitu kona-ba autoria krime falsifikasaun dokumentus i esplorasaun jogu ilisítiu husi artigu 302 nú.1 i 322 nú.1 kodigu penál nian.
Mandadu detensaun primeiru interogatóriu husi TDB, hatete iha liña A. halo detensaun ba ema ne'ebé temi nu’undar suspeitu, sei halo investigasaun, tanba halo krime falsifikasaun dokumentus i notasaun tekníku ba explorasaun jogu ilisítiu husi artigu 302 nú.1 i 322 nú.1 kodigu penál nian.
Maibé, na'in ba kompaña Janela Almores Unipesoal Lda, ho inisiál AN, argumenta, PCIC ne'ebé halo auto buska ba aktividade jogu, tanba konsidera jogu ne’e husi tinan-2017 to'o 2022 ilegál no halo falsifikasaun dokumentus.
Maibé, dokumentus ba jogu refere, hetan rejistu husi komersiál, autorizasaun atividade husi SERVE.IP.
"Mais sira deskomfia parte MTCI mais PCIC katak, sasan ne'e ilegál i kontra, mais tuir ha'u nia komprensaun tuir dekretu lei nú.34/2007 ne'ebé aprova husi Prezidente Repúblika, Primeiru Ministru ho Ministru MTCI fó kompetensia tomak ba SERVE mak bele fó autorizasaun ba kualker atividade, ami bazeia ba ida ne'e mak durante ne'e ami nia aktividade la'o i ami mós selu taxa ba nasaun," nia informa
Konsidera selu taxa ba estadu ne'e ilegál, bolu SERVE.IP, servisu notariadu, Impostu Baukau, finansas nasionál hodi halo esplikasaun iha Tribunál, tanba sira mak iha kompetensia atu deside jogu ne'e legál ou ilegál.
"Halo ona aprensaun ba ha'u nia aktividade jogus ida ne'e, ha'u sei halo auto keixa ba Tribunál para bolu sira orgaun relevante esplika iha Tribunál katak, ne'e ilegál ga legál, ami iha dokumentus parte balun mak lakompleta sira mai halo aprosimasaun para ami halo kompleta, lolos sira halo auto buska ba aktividade, tanba ida ne'e ami fulan-fulan selu taxa," nia hatete
Enkuantu taxa ne'ebé kompañia refere selu ba estadu depende ba rendimentu. (*)
