Desizaun halo dezmantela ba ró navál ho marka NRDTL Kamanasa, basea ba despasu hosi Ministru Defeza númeiru 1143, 11 jullu 2022, hodi autoriza Xefe Estadu Maior Jenerál F-FDTL halo dezmantellamentu ba ró NRDTL Kamnasa.
Komandante Komponente Navál, Kapitaun Mar e Gerra, Higio das Neves hatete, Komandu F-FDTL deside halo dezmantella ró NRDTL Kamanasa, tanba kondisaun ró refere labele halo ona operasaun iha tasi laran.
“Ohin ita halo abate ka dezmantella ba ró komponente navál ida ho marka NRDTL Kamanasa. Dezmantellamentu ida-ne’e ita halo ho objetivu, tanba haree ba kondisaun ró ne’e rasik labele ona halo operasaun iha tasi laran, tanba ró ne’e tuan los ona, kuaze tinan 30 ona. Liuhusi dezmantelamentu ne’e, ita lori sai tiha sasán armas militár sira ne’ebé mak iha ró ne’e nia laran, nune’e ita bele entrega filafali ba jestaun patriónio estadu atu tau matan fali ba ró”, dehan Komandante Komponente Navál, Kapitaun Mar e Gerra, Higio das Neves, hafoin prezide seremónia dezmatellamentu ba ró komponente navál Kamanasa, iha Portu Dili, sesta(22/07).
Tanba ró ne’e rasik apoia mai husi Governu Xina iha tinan 2010, no halo nia primeiru operasaun iha área kosta súl iha 2022.
“Maibé husi 2010 to’o mai ohin loron, ró Kamanasa ne’e labele halo operasaun, tanba nia kondisaun ladi’ak, atu halo operasaun”, hatete nia.
Ró ne’e para kle’ur ona iha portu Dili, hodi okupa espasu portu Dili. Tanba ne’e, Komandu F-FDTL deside hodi demantella ró ne’e, nune’e bele muda sai husi espasu ne’ebé mak nia para ne’e, hodi fó fali fatin ró seluk atu atraka.
“Ita-nia ró ne’ebé mak Governu Austrália sei apoia Timor-Leste iha 2023, bele atraka filafali iha fatin ida-ne’e”, haktenik nia. (*)