“Nune’e ita rekomeda ba Ministru Defeza atu haree assuntu lalais assuntu problema ida-ne’e tanba ita-nia riku-soin barak oinsá ita-nia komponente Navál halo kontrola bele asegura ita-nia riku-soin iha tasi, imposivel sira ba de’it ho bero”, dehan nia bá jornalista sira iha Edifísiu FM Bairu Sentrál, segunda (25/07).
Tanba komponente Navál ne'e serbisu diferente ho serbisu terrestre tanba ne’e mak fundasaun Mahein lamenta Ministru Defeza husik de’it problema ne'e , to'o agora.
“Ró sira ne’e avaria hotu no membru komponente Navál hala’o de’it sira nia serbisu iha sira-nia edifisiu ne'e la’ós kulpa boot ba komponente Navál maibé polítiku na'in sira mak hala’o polítika la di’ak”, afirma nia.
Rekomenda mak Ministériu Defeza atu solusiona urjentemente Problema Komponente Navál hodi nune’e membru Navál sira bele kontrola rikus-soin sira iha Kosta Súl.
Antes ne'e, Komandu Falintil-Forsa Defeza Timor-Leste (F-FDTL), husi Komponente Navál halo ona dezmantelasaun ba ró RNTL kamanasa, ne’ebé kondisaun aat ona labele halo operasaun.
Komandante komponente Navál, kapitaun Mar e Guerra Higino da Neves hatete, problema iha manutensaun hahúdesde Governu koreia oferese iha tinan 2011, atu aumenta kapsidade operasional ba komponente Navál, maibé ró to’o iha Timor-Leste la konsega halo operasaun, tanba ró avaria tinan 10 nia laran.
“Ita halo mamutensaun dala ida duni, maibé osan la sufisiente manutensaun ida-ne’e la efetivu, bainhira halo manutensaun hotu, treinu hanesan guardasaun dala ida iha tesi, la to’o fulan tolu aat fali ami para de’it iha-ne’e”, dehan Higino ba jornalista sira iha Portu Dili foin lalais ne'e.
Ho ró RNTL Kamanasa ne’e kondisaun aat, komandu lakohi gasta osan atu halo manutensaun, tanba ró nia kondisaun tinan 30 ona nia kapasidade ekonomia kuaze labele ona halo operasaun, tanba hadi’a mós kontinua aat F-FDTL labele halo misaun iha tasi. (*)