Tuir informasaun ne’ebé www.tempotimor.com, asesu iha pájina Servisu Relasaun Públika, saabadu (06/08) katak, Komandante Komandu PNTL Munisípiu Dili, Superintendente Xefe Henrique da Costa haktuir, atividade ne’e halo hodi eduka nafatin sidadaun sira atu respeita kódigu estrada.
“Ohin kalan hanesan baibain ita orienta eskuadra PNTL hotu kontinua halo knar operasaun rutina hodi halo Auto Stop ba motorizada sira ne’ebé halo movimentu iha tempu kalan hodi halo prevensaun ba asidente tráfiku no dezenvolve kampaña seguransa rodoviária nune’e bele eduka nafatin ita-nia sidadaun sira hodi respeita leis tranzitu”, informa Komandante Henrique.
Tanba atividade ne’e halo hodi kontrola jestaun veìkulu no kria ambiente kondusaun seguru ne’ebé efika no efisiénte ba motorista sira inklui haree mós ba sasán kontra bandu sira seluk.
“Ita foka de’it ba motorizada no ita halo aprensaun ba motorizada hamutuk 90 kompostu husi motorizada 49 prende iha Eskuadra Cristo Rei, Bekora no Eskuadra Dom-Alexo ne’ebé halo check point iha Raikotu Komoro prende motorizada 41 enkuantu totál hamutuk 90 ne’ebe viola dekretu lei númeru 6/2003, Kódigu Estrada”, esplika nia.
Iha atividade pasa revista ne'e, konsege identifika sidadaun barak mak kontra kódigu estrada tanba la monta asesór hanesan xapa matríkula oin kotuk, lampu no ispellu laiha, la uza kapasete, uza kanu racing halo barullu no maioria laiha karta kondusaun.
“Motorizada hirak ne’e sei entrega hikas na’in, maibé tenke liuhusi prosesu administrasaun lori nota infrasaun ba selu multa iha banku BNCTL (Banco Nacional de Comércio de Timor-Leste) hafoin mai foti fali sira-nia motorizada”, hatete nia.
Ba atividade patrulla la’o ain ne’e hala’o husi eskuadra Na’in-Feto, Vera Cruz, Metinaro, entretantu atividade pasa revista hala’o husi Eskuadra PNTL Cristo-Rei no Eskuadra PNTL Dom Aleixo, no hetan apoiu husi Servisu Investigasaun Kriminál, Servisu Informasaun Polísia no Sesaun Forsa Rezerva, ne’ebé apoiu Sesaun Tránzitu Dili. (*)