Nu'udar Komandante Supremu Forsa Armada, Prezidente Republika hakark hato'o mensajen tanba instituisun FALINTIL ohin loron nian nu'udar kontinuadór direitu husi FALINTIL.

"Nu' udar Komandante Supremu Forsa Armada, hau dirije mensajen espesial ba instituisaun kontinuadór husi FALINTIL atu kontinua kaer metin obra sira-nian no tau iha asaun ne'ebé konkreta iha vida militar nian. Imi mak kontinuadór diretu husi FALINTIL," dehan PR Lú Olo, liuhusi nia diskursu iha komemorasaun loron Forsa Armada Libertasaun Nasionál Timor-Leste (FALINTIL) ba dala XL, iha Kuartél Jerál Fatuhada, Kinta (20/8).

Nia afirma, F-FDTL ne'ebe Lidera husi Lere Anan Timur, Falur Rate Laek, Sabika Besi Kulit, Aluc Descartes, Mau-Nana, ne'e nu'udar kontinuadór husi FALINTIL.

Sira iha dever atu hatene istória no kaer metin valór sira hosi FALINTIL nian, hanesan sakrifisiu, prinsípiu ne'ebe metin, no kapasidade atu reziste, biar laiha meiu.

Ho valor hirak ne'e, nia dehan, atu F- FDTL bele kaer metin no adapta iha misaun ne'ebé diferente no transforma tuir konjuntura modernu nian hanesan kapasidade atu apoia povu iha dezastre naturais no domina teknolójia foun sira.

Nia fo ezemplu, hanesan Pandemia COVID-19 konsege fó ameasa ba seguransa nasionál no ida ne'e hatudu mai katak, iha tempu agora defende soberania la'ós de'it ho kilat.

Maibé, Koñesimentu fatór importante no fundamentál ba forsa F-FDTL, atu buka aprende ho matenek hodi sai lutu ida ne'ebé metin ba Povu tuir prinsipiu no valor asswa'in FALINTIL nian hanesan sakrifisiu, lealdade, dixiplina, obediénsia, onestidade, nasionalizmu no patriotizmu.

"Koñesimentu ne' ebé di'ak, kapasidade morál ne' ebé aas no relasaun metin ho povu sei halo F-FDTL nia-naran morin ba beibeik," tenik Xefe Estadu. (*)