Superentendente Polísia João Belo deklara asuntu ne’e hodi responde ba rumoris no akuzasaun balun husi públiku katak, membru sira balun simu subornu durante operasaun iha terrenu.
"Infrasaun hotu-hotu selu iha banku, dala ida tan, infrasaun hotu selu iha banku, laiha infrasaun ida mak selu ba Polísia, se selu ba polísia, ne'e iha kategória rua, mak subornu no korupsaun," Superentendente Polísia João Belo hateten lia hirak ne’e iha knaar fatin Kaikoli, Dili, Kuarta (4/11).
Komandante ne’e mós husi kualkér sidadaun ne’ebé karik hetan membru polisia balun iha terrenu simu subornu, bele aprezenta dadus ba komandu PNTL.
"Husu ba públiku no komunidade tomak, karik identifika membru Polísia ruma mak husu osan direta ba imi, relata ba ami-nia diresaun, tanba kazu infrasaun, laiha membru polísia ida mak husu ka komunidade fó osan ba membru polísia iha fatin servisu," katak Nia.
Nia mós akresenta liután, bainhira hetan membru polísia balun mak komete kazu subornu ka korrupsaun ne'e, komunidade rekolla kedas dadus hanesan fatin akontesimentu, oras, loron no identidade pesoál ne'ebé husu ka fó osan.