“Orseik ita halo apreensaun ba motorizada ba apoiante sira husi kandidatura númeru 14 maibé la'ós 14 de'it, ita mós halo apreensaun ba apoiante sira husi partidu seluk ne'ebé tuir oráriu CNE halo kampaña iha Dili, nune'e orseik ne'e ita prende motorizada hamutuk 112”, dehan Segundu Komadante PNTL, Munisípiu Dili, Superentidente Assistente João Sancho Pirres, bainhira akompaña hela membru sira halo passa revista iha Rotunda Nicolau Lobato, Komoro, kuarta (16/03).
Ba operasaun loron horisegik husi dader to’o kampaña remata, PNTL prende motorizada sira ne'e, tanba balun uza kanu rasing, la uza kapasete, tula ema na’in-tolu, laiha espelho, inklui la monta sapa matrikula.
Maske PNTL halo apreensaun ba motorizada hirak-ne’e, maibé kontinua autoriza atu motorizada nia na’in sira bele partisipa iha kampaña eleitorál.
"Maibé, atu foti filafali sira-nia motorizada mak sira tenke liuhusi prosesu selu multa”, afirma nia.
Dadaun ne'e mós Komandu PNTL Dili kontinua hala’o atividade pasa revista, hodi kontrola movimentu transporte públiku liliu motorizada sira ne’ebé konduz husi militante no apoiante sira partidu FRETILIN ho KHUNTO inklui kandidatura númeru sorteiu 8. (*)