"Iha 2020 PNTL hala'o knaar no esforsu tomak hodi asegura povu inklui riku-soin ema hotu nian iha Timor-Leste. Maski nune'e, PNTL mós rejista kazu insidente iha nivel teritóriu nasionál tomak hamutuk 4.197," Komisáriu Faustino da Costa hateten liuhusi konferénsia imprensa iha Komandu Jerál Kaikoli, Tersa (29/12).
Nia mós afirma, alende husi kazu insidente ne'e iha mós kazu asidente ne'ebé PNTL rejista mós númeru boot.
"Husi 1 Janeiru to'o 27 Dezembru 2020, PNTL mós rejista kazu asidente rodoviáriu husi munisípiu 12 inklui RAEOA hamutuk 1.415, ho akontesimentu sira ne'e ema ne'ebé lakon vida hamutuk 78," nia dehan.
Komandante apela ba motorista sira katak, hela loron balun hodi tama ona ba tinan foun 2021, tanba ne'e husu ba ema hotu la'o ho kuidadu, atu nune'e bele festeza tinan foun ne'e ho di'ak.(*)