Komandante Jerál PNTL Komisáriu Faustino da Costa hateten, durante implementa estadu emerjénsia, PNTL mós loke prosesu liu atus ida ba membru PNTL.

"Durante implementa estadu emerjénsia hahú husi marsu to'o agora, PNTL mós loke prosesu balun ba aktu atuasaun no atendimentu membru PNTL nian ne'ebé kazu rejistradu hamutuk 181," Faustino hateten liuhusi konferénsia imprensa iha Komandu Jerál, Kaikoli, Tersa (29/12).

Nia akresenta, husi prosesu sira ne'e hotu, PNTL mós la taka matan hodi kontinua prosesu bazeia ba regra disiplinár PNTL nian.

"Husi kazu 181 ne'e, prosesu 26 mak hetan ona desizaun liu-liu ba iha suspensaun iha kazu sia mak hetan demisaun, kazu ne'e ne'e komete iha 2018 no 2019 nian, maibé iha kazu 2020 ne'e na'in tolu ne’ebé foin hasai iha tinan ida ne’e," nia hateten.

Membru sira ne'ebé hetan demisaun ne'e komete kazu hanesan abandona servisu, envolve arte marsiál no seluk tan, maibé sira seluk ne'ebé seidauk iha desizaun kontinua iha prosesu.

Komjer ne'e husu ba membru no komandante sira atu sai uluk ezemplu ba implementadór lei no ordem iha teritóriu nasionál.(*)