Portavós Komandu Jerál PNTL, Superintendente Xefe, Arnaldo de Araújo haktuir, suspeitu ho inisil FA ne'e, sai husi rai viziñu Indonézia, iha loron kinta (28/02) oras kalan, atu mai haree nia inan-aman ne'ebé iha munisípiu Kovalima, maibé hafoin halo vizita, parte komandu PNTL munisípiu Kovalima to'o kedas iha fatin hodi kaptura nia no lori ba fatin izolamentu iha kuarentena Suai, Kovalima.
"Ema ida ho naran FA nia tama ilegalmente mai haree nia inan-aman iha Suai Kovalima, nia mai halo vizita, depois ida-ne'e polísia sira ba lori nia mai entrega iha Kuarentena," Superintendente Xefe Arnaldo de Araújo liuhusi Konferénsia Imprénsa, iha Kaikoli, segunda (08/02).
Arnaldo dehan, bainhira suspeitu FA kumpri tiha loron 14 iha kuarentena Suai, durante oras 72 hein hela suspeitu hodi bele submete ba iha prosesu investigasaun.
"Tanba ita hatene kuandu tama mai ilegál, agora daudaun ita kanaliza sira ba iha kazu kriminál. Ida-ne'e mak ami hakarak imforma", dehan nia.(*)