Liuhosi informasaun ne'ebé www.timortimor.com asesu hosi pájina TLMC, bazeia ba modelu meteorolójiku no avizu sira husi Bureau of Meteorology (Agéncia meteorolojia husi Australia) sentru tropical cyclone warning nota katak dadaun ne'e kauza kalamidade públiku iha kapital Dili nomós Munisípiu sira transforma ona ba tropical cyclone ho naran Seroja.
Tanba, Tropical Cyclone Seroja, oras ba oras kontinua do'ok husi Illa Timor ho categoria 1 iha ne´e sustenta anin ho velocidade 75 km/h ho rajada anin to´o 100 km/h. Lokalizasaun ezatu husi seroja iha momento ne´ebé públika sai informasaun ida ne´e mak 55 kilometru husi 10.5 grau sul, 122.5 grau leste, 135 kilometru oeste husi NTT (sudeoste husi Kupaun-Indonézia).
TLMC informa mós iha kondisaun tempu iklima loron segunda no tersa (5-6/04) iha área, Costa Norte, Dili, Likisá, Manatuto, Baukau no Lautein iha possibilidade atu akontese udan ho intensidade fraku to´o moderadu akompaña ho anin ho intensidade moderadu ba forte.
Setór sentral Ermera, Ainaro, Aileu, Same, Bobonaro iha tendénsia atu akontese udan ho intensidade fraku to´o moderadu akompaña ho anin ho intensidade fraku ba forte.
Costa Sul hanesan Suai, Vikeke iha possibilidade atu akontese udan ho intensidade fraku akompaña ho anin ho intensidade fraku to´o moderadu.
Entertantu ba RAEOA iha tendénsia atu hetan udan been ho intensidade moderadu ba forte ho rajada anin ne´ebé mak bele supera 25 km/h to´o loron tersa (06/04).(*)