"Agora ha'u-nia responsabilidade boot ne'ebé que iha ha'u-nia oin ne'e, ha'u tenke hala'o, e estabilidade mak importante liu, maibé bainhira ha'u sente ha'u-nia kapasidade iha, ha'u dehan ha'u prontu, funu ne'ebé que lori mate mós ha'u bele, nusa mak prezidente tur iha ne'ebá, depois ho tan seguransa nusa maka la bele, pois asesor rihun rahun iha tan ha'u-nia sorin, nusa mak ha'u la bele”, hatete Lere hafoin reuniaun ho Prezidente Repúblika, Francisco Guterres 'Lú Olo', iha palásiu prezidensiál Bairopite, kuarta (07/07).

Maske seidauk hanoin atu ko’alia kona-ba kandidata-an, maibé povu rasik fó konfiansa Lere prontu kompeténsia iha eleisaun prezidensia iha tinan 2022.

"Ohin imi husu, se hakarak sai Prezidente?. Ha'u dehan sé povu mak hili lá'ós ha'u mak dehan, ha'u mak hakarak, hakarak ne'e hothotu hakarak, mas agora ema tenke fó konfiansa, povu fó konfiansa sim, ha'u sei kandidata-an, agora ha'u hatete tan ha'u seidauk hanoin mas se kuandu ha'u hakarak kandidata, ha'u-nia objetivu mak ida de'it servi nasaun”, esplika nia.

Bainhira kandidata-an kompeténsia iha eleisaun manán no lakon simu, laiha objetivu seluk, maibé manán servi nasaun no povu lakon kontribui nafatin.

"Porezemplu, ha'u ko'alia polítika uituan ew, ha'u-nia alin Naimori ko'alia ne'ebá ne'e la iha , ami kandidatu ida  ne'e para koko forsa partidu  nian ne'e, taun ha'u dehan hanesan ne'e la bele, kandidatu lakon lakon ona, manán servi nasaun ne'e importante, la'ós ho objetivu seluk, taun la iha”, hatete nia.

Maske Nia lahatene, mas ezemplu dehan kandidatu ba prezidente ema vota depois kada votante US$4, tanba votu ihun-100 bele hetan ona osan barak, maibé husu atu kandidatura sira labele hanoin ida ne’e, tanba importante nasionalizmu no patriotizmu.

"Ita tenke ho ita-nia nasionalizmu, patriotizmu, ita deve ema barbarak ne'ebé mate ona, ohin loron la hamutuk ho ita, nia rán nakfakar atu hari’i nasaun ida ne'e atu sai buras, atu sai nabilan iha mundu nia matan, ita tenke servisu ho sentidu estadu ho responsabilidade, nasionalizmu, patriotizmu tenke nakonu iha ita-nia fuan, tenke  nakonu iha ita-nia laran ida ne'e mak importante liu”, afirma nia.

Tanba ne’e, sidadaun sira ne’ebé hakarak kandidata-an ba Prezidenste ka sai líder, Ministru, iha objetivu mak servi, valoriza eroi sira ne'ebé fó-an liberta povu no rai.

“Ha'u hanoin katak, patriota sira, timoroan sira, hakarak kandidata-an ou hakarak sai líder nasaun ninian objetivu ida ne'e mak importante liu”, hatete Lere. (*)