Tempotimor (Dili) – Ministru Defeza no Seguransa (MDS), Filomeno de Jesus da Paixão ezije ba Ministériu Públiku no tribunál atu koopera ho parte Defeza Seguransa.   

Ezijensia ne'e relasiona ho kazu krime barak, ne'ebé bainhira to'o iha Ministériu Públiku (MP) no tribunál ba suspeitu sira, MP no tribunál kondena ho Termus Identidade Rezidénsia (TIR) de'it.     

“Bainhira PNTL ho FDTL kaer suspeitu, entrega ba MP no Tribunál. Ikus mai, sira fó de'it Termus Identidade Rezidénsia (TIR). Depois, bainrua ka baintolu kaer filafali ona," Paixao hatete ba jornalista iha Palásiu Governu, Kuarta (24/07/2019). 

 MDS husu parte hotu atu servisu integradu no koordenadu para bele efetivu. "Se husu polísia no forsa halo esforsu kaer ema, depois ba fatin seluk nia hetan TIR. Depois nia ba pasiar la'o lakon tiha. Depois nia mosu fali halo tan. Depois ami kaer, ami kaer beibeik hodi halo saida? Di'ak liu husik oho malu de'it ona. Oho malu ona mak ba foti hakoi," nia dehan. 

Tuir MDS Filomeno Paixão katak Polísia no F-FDTL hala'o knaar ona, maibé MP no tribunál tenke koopera. "Ate agora, imi hotu haree. Ida ne'ebé mak polísia la halo? Entaun, nia sala iha ne'ebé? Labele husu de'it ba polísia. Labele husu de'it interior. Labele husu de'it defeza. Husu mós ba iha Ministériu Públiku no tribunál. Tanba bainhira ami kaer, ami haruka ba sira," Filomeno Paixão hatete.