“Hakarak informa tan, liliu kazu ne'ebé mak akontese tiha ona iha semana kotuk liuba, omesídiu ne'ebé mak mosu iha Delta 3 ne'e, Polísia Nasionál Timor-Leste, liuhusi Servisu de Investigasaun, halo ona identifikasaun ba ema na'in-17, e sira-nia prosesu lori ona ba Ministériu Públiku, ita hein katak prosesu ne'e, ministériu públiku mak sei adianta lori ba Tribunál”, informa Portavóz Komandu Jerál PNTL, Superintendente Arnaldo de Araújo, iha Kaikoli, segunda (19/07).
Hatan kona-ba família matebian sira kestiona servisu Polísia nian ne'ebé to'o oras ne'e seidauk kaptura autór sira, maibé polísia iha nia tátika servisu rasik atubele buka tuir suspeitu sira hodi kaptura autór kriminozu sira iha tempu badak.
“Sim, h'au bele hatete katak, polísia iha nia téknika, nia maneira para oinsá bele kaptura ema sira ne'e, e ha'u labele relata katak, sé mak oho, sé mak la oho. Buat hotu ita hein de'it, kuandu mandadu tun mai, ba A ka B, mak ita foin hatene A ka B mak halo ida ne'e. Maibé, ita hothotu hein de'it, iha tempu badak, buat hotu bele la'o ho di'ak. Maibe, ha'u ohin dehan tiha, polísia indentifika ona ema na'in-17, e nia prosesu ba ona iha ministériu públiku, ita hein de'it, iha tempu badak sé mak autór inteletual iha ne'ebá, envolve diretamente iha ne'ebá, ita hein deit”, afirma nia.
Matebian Fitalíçio Soares, husi Postu Administrativu Luro, Munisípiu Lautém, hetan oho husi ema deskuñesidu iha área Delta 3, loron (09/07), maizuomenus tuku 00:00 oras timor-leste (otl). (*)