"Juramentu ba bandeira, liafuan ida ne'ebé lulik, todan, imi tenke kumpri. Liafuan ida mak imi labele haluha mak ida ne'e, ha'u prontu fó ha'u-nia vida ba ha'u-nia nasaun, ba ha'u-nia rai. Ne'e úniku, imi prontu. Mas imi sei lori fulan tolu ka haat, atu tama ba juramentu ida ne'e", dehan Tenente Jenerál Lere Anan Timur, durante hato’o mensajen ba kadetes sira iha kuartel jenerál, Fatuhada, segunda (27/09).

Maske nune'e, atu to'o iha juramentu, joven, timoroan sira sei hakat, sei liu situasaun sira ne'ebé difisil, tanba instrutór sira sei koko mentalidade, sei koko matenek, koko forsa, pasiénsia, no sakrifísiu.

"Iha funu ruma karik, nia haruka imi ba mate, ba mate de'it, dehan ó lalika hakiduk. Ne'e valór, prinsípiu Falintil ninian. Ninia komandante haruka dehan katak, ó ba iha ne'ebá, nia hatene katak nia sei kanek ka nia mate, mas nia kumpri ordem ba. Ida ne'e mak militár ninia dixiplina. Militár nunka dehan lakohi. Ninia komandante haruka, ó kumpri de'it. Nunka dehan ha'u lakohi. Liafuan lakohi iha militár nia laran, lulik. O tenke hakarak. Tanba ida ne'e imi prontu ona atu infrenta situasaun hirak ne'e", hatete Lere.

Kadetes foun sira hotu mesak timoroan, maibé Timor-Leste liuhusi funu naruk ida, tinan 24 nia laran, timoroan barak, fakar nia rán, timoroan barak, terus, ohin loron sei tanis, no sei halerik.

"Ninia jerasaun barak agora hamri’ik iha ne'e, atu hatutan ninia aman, ninia maun, ninia alin, ninia tiun, ninia avó, ninia servisu. Sira ohin loron lahamutuk ona ho ita, maibe ninia memória metin nafatin iha ita sira ne'ebé sei moris. Tanba ida ne'e mak imi kuaze 200 resin ka 300, bolu imi dehan jerasaun patrióta, rekrutamentu espesial, ne'e imi iha responsábilidade boot. Imi mak tenke sai banati, sai ezemplu ba forsas armadas tomak", afirma nia.

Tanba ne’e, husu ho lian maka'as ba membru foun sira atu labele repete tan krize hanesan iha tinan 2006, ne'ebé hahú husi nia alin sira ne'ebé uluk terus ba funu, uluk fó nia kontribuisaun ba funu, militár sira zero um (01) ninian mak, sira nakfilak-an, kontra ninia komandu rasik.

"Ha'u husu ba imi, atu leal nafatin, laran moos nafatin ba imi-nia komandu, mak ami na'in-tolu, hau nu'udár Xefe Estadu Maior Jenerál, Vise Xefe Estadu Maior Jenerál, e Xefe Estadu Maior Jenerál. Imi tenke leal, tenke laran moos. Ami iha ne'e, la'ós sai de'it imi-nia komandante, maibé sai mós hanesan imi-nia aman, imi-nia maun, ami sei tau matan ba imi", dehan nia.

Maibé husu tan dala ida, ba sira jerasaun patrióta, rekrutamentu espesiál, sira tenke sai banati, tenke sai ezemplár.

"Ba imi hothotu, imi mesak timoroan, imi mak sai lutu ba nasaun, seguransa ba ita-nia povu. Imi aban bainrua sei servi ba servisu hamutuk ho imi-nia inan-aman, la'ós toba de'it iha kazerna", haktenik  Lere.

Kadetes foun Falintil FDTL hamutuk na’in-600 ne'e, kompostu mane na'in-539 no feto hamutuk 61, husi rejíme espesiál (veteranu sira-nia oan) no rejíme jerál. (*)