"Sim, ita tau ona osan kuaze 2 mill liu atu halo manutensaun ba serine rua ne’e, ne’ebé diresaun jestaun risku dezastre halo ona espesifikasaun ho ita-nia peritu sira halo estudu ona atu halo  manutesaun”, dehan Diretór Jerál Sekretáriu Estadu Protesaun Sivíl (SEPS), Superintendente Polísia Ismael Babo, iha Kaikoli, sesta (04/02).

Serine rua ne'e, presiza halo manutensaun tanba simu apoiu husi doador sira nune'e la garantia ninia sustentabilidade, ne’ebé iha tinan 2021 no tinan 2022 ne’e, tau ona osan ba manutensaun, atubele funsiona filafali.

Tanba serine rua ne’e nia funsaun atu sai hanesan multifunsional ida ba alerta tsunami no alerta mós ba dezastre sira ka bee sae ruma iha Kapitál Dili.

Aleinde serine rua ne'e SEPS iha ona posibilidade atu hari’i tan serine balun iha fatin sira ne’ebé mak risku ba iha bee sa’e no tsunami.

"Operasaun protesaun sivíl ninia ne'e, sei eziste de'it iha nasionál, Lei orgánika autoridade protesaun sivíl, espera iha oportunidade ida no Prezidente Republika akompaña para promulga lalais lei orgánika protesaun para protesaun sivil nia estrutura bele instal iha nasional to’o postu administrativu no Munisípiu sira, atu nune’e sentru operasaun ne'e mós eziste iha Munisípiu”, dehan nia.

Bainhira sistema alerta sira kuandu tama iha nasionál kontinua ba Munisípiu atu halo kompaña sensiblisaun  ba populasaun nomós alerta ba polulasaun sira iha Munisípiu.

"Sentru operasaun ne'e, importante tanba sistema sira ne’e mak fanu ita no fó hanoin ita katak hodi kalan rai nakdoko hanesan ne’e hanesan, tanba ita-nia sentru operasaun iha Dili de’it la to’o iha Munisípiu entaun iha Munisípiu presiza instala para ita bele injesta informasaun husi nasionál ba Munisípiu no Munisípiu mai Nasionál para iha liña koordenasaun no komunikasaun baze dadus ne’ebé mak importante para ita halo prevesaun ba ita-nia sidadaun sira-nia vida iha ambiente sira dezastre Naturál”, esplika nia. (*)