"Ba dia 4 Abríl nia ne'e, apoiu mais de 31 mil xefe família afetadu iha territóriu nasionál, 100% ita fó apoiu hotu ona. Falta de'it husi janeiru to’o dezembru 2021 ne'ebé rezistu uma estragu mill 5-resin ne'e iha rihun-rua-resin mak ita fó ona rekuperasaun, maibé sei hela rihun-rua-resin mak seidauk fó rekuperasaun tanba sira sei hela iha fatin risku ba dezastre”, Superintendente Polísia Ismael, iha Kaikoli, sesta (04/02).
Ba vítima rihun-rua-resin ne'ebé SEPS fó apoia ne'e tanba sira hirak ne'e tama iha kriteria, bazeia ba lei SEPS artigu 21 utilizasaun ba rai, nomós dekretu lei númeru 7, artigu 9 ne'ebé mak SEPS fó apoiu kuandu sira la fila ba hela iha área risku ba dezastre.
Tanba lei la fó dalan atu SEPS atu fó rekuperasaun ba sira ne’ebé hela iha foho lolon, mota laran, iha área Tasitolu, Komoro, Bidau, Hera no Metinaru, tanna hela nafatin iha área risku ba dezastre.
Entretantu iha família balun ne'ebé mak rai iha Dili laiha no sira foti desizaun ba hela iha Munisípiu, nune'e SEPS apoia sasán konstrusaun, ba halo sira nia uma iha Munisípiu.
Maibé ba sira ne'ebé to’o agora hela iha mota laran, SEPS sei nafatin la fó rekuperasaun ba saida de'it kuandu dezastre mai.
"A não ser sira deside muda sai husi fatin risku ba fatin di'ak, ne’e mak SEPS bele fó rekuperasaun ba sira”, afirma nia. (*)
